Ralhrang bawmhnak tangka hi kan cohlan lai maw cohlang lo, zeitindah nang na ruah

Kan hnu Mocha thlichia ruang ah Kawlram chung ah inn tampi a rawk. Rakhine ramkulh hna cu a rawk dih ngawt khi a si ko. Min Aung Hlaing nih a mah pumpak kal bak in a va zoh i bawmhnak tangka zong tampi a pek hna.

Kannih Chin ramkulh zong ah tu tiang theih khawh tawk ah inn 1800 leng a rawk. Mahhi inn a rawk mi pawl cu ralhrang nih bawmh ding in an ti cang. Ralhranv tuanvo ngeitu pawl zong an i thiah cang.

Si ahcun ralhrang nih bawmhnak an kan pek mi lunglawm tein maw kan cohlan lai, si loah kan cohlang duh lai lo dah. Ruahnak phun hnih in a um mi a si.

Ralhrang nih tangka an kan pek ahcun cohlan ding si ko. Tangka an kan pekmi cohlan ruang ah nan uknak kan duh tinak a si hlei lo. Ralhrang tangka kha kan i lak  a si ko tiin ruahnak phun khat a um.

Cun, ralhrang nih hi tluk in kan inn lo an khangh, an hrawh. An kan thah le harnak an kan pek lio ah an bawmhnak pek zong cohlan ding a si lo. Ralhrang nihcun Sui hmanh kan pe hna sehlaw i lak ding a si lo. Zei bantuk harnak kan ton zong ah an mah ralhrang bawmh hrim kan herh lo tiin ruahnak phunkhat a um ve.

Nang zeitindah na ruah. Thlichia nih Chin ramkulh ah inn tampi a hrawh. Mah tluk ram buai lio le har lio ah mah pumpak cun remh fawi ding a si lo. Ralhrang bawmhnak cun maw kan remh lai si loah kan mah tein dah kan cawl ko lai.

CRD:Myanmar News