====================

Patungno pakhat a um. A fawizannak in Pa Thlir ti ko usih. A thau pah, a niam pah fawn. Beer a duh ngai. Cun KTV kal zong a huam bak. Asinain atu cu Beer lawng a ding. KTV kal cu aa ngol cang. A ruang cu hitihin a si.

KTV kal a huam tuk lioah an nu nih cun KTV kal cu a duh lo. Kal lo dingin a thlauh, a kham peng. Asinain Pa Thlir cu thlauh le kham khawh ngaingai a si lo. A vun rit nawn cang ahcun KTV ah a choi colh ko. A hawile nih an sawm caan ah zulh loin a um kho hna lo.

Asinain an nu nih a duh lo tuk caah a thlithup deuh in a kal tawn. Inncar lei in a chuah chel, thlalang-awng in a zuan chel. Cucu an nu nih a rak ngiat ziar cu teh.

Nikhat cu zanlei nitlak lai hrawngah Pa Thlir cu a ri nawn cang, a thli tein a chuak i an inn pawng i KTV ah a va lut. A ṭhut tawnnak cabuai i a ṭhut tlawmpal ah an nu zong a rak lut ve. Pa Thlir cu a lau kho tuk.

“Ziah, zeitin kan nu? Ziah na rak luh ve”.

“Kei zong KTV ah hlasak ka duh ve si”.

Pa Thlir cu a khuaruah a har, chim awk a thei lo.

“Aaaa, vei, vei, immmm”.

“Zeihme, sak khawh a si lo maw”.

“Aw….sak…sak cu a ngah ko eh”.

“Cuti si ahcun a ṭha ko cuh, hey…ka nau, rak ra ta”.

An nu nih rianṭuantu tlangval pakhat cu a hei auh.

“Ka u, zeidah na cah lai”.

“Hi pa a rak rat caan i na tuahpiak tawn mi le a pawngah a ṭhu tawn mi nungak kha vun au”.

“Elaw siseh, rawl cu a ei lem lo. Beer a ding, cun Sandy he an ṭhu tawn”.

“Ok, cucu a rannak in vun timtuah ne”.

Pa Thlir cu a lau cang.

“Aaa, kan nu, hla lawng ka sa ko lai, vei…”

“Dai ko, a hlan tawn bantukin hmeteh. Nuam tein um. Ka um ruangah na lungbuai hlah. Kei zong nangmah bantukin kaa nuam ve lai cu, nuam tein um ko. Ka thin a hung lai lo, biatak ka chim”.

Tlawmpal ah Sandy cu sexy taktak in Beer i put in a ra i Pa Thlir kam ah a ṭhu. An nu nih Sandy cu lakphak dinnak ah tiin thonghra tlap (Kawlram tangka) 5 a pek. Rianṭuantu tlangval zong cu tlawmpal a ṭhenh ve.

“Keimah he hlasakṭi dingin tlangval pakhat na ka sawmpiak kho lai maw”.

“Heeee, ka u, hika ah cun nu lawng hlasatu an um”.

“Pakhat khat, ahopaoh ka sawmpiak ko, lakphak dinnak tam deuh kan ṭhenh lai”.

Rianṭuantu tlangval pate cu lukheuh pah in a chuak i tlawmpal ah tlangval pakhat he an rak lut ṭhan.

“Ka u, amah hi hika KTV i kan seh vialte a tlaitu a si. Hlasak zong a thiam ngai, amah nih an bawmh lai”.

“Si maw, a ṭha tuk cuh, ka pawngah rak ṭhu tuah”.

Pa Thlir cu uite ekchuak a lo cang.

“Hey, Sandy na upa cu Beer vun thlet ca, na tuah tawn bantukin ningzak lo tein vun tuah ko”.

“Aw aw, elaw”.

Cuticun, Pa Thlir le Sandy cu hlasakṭi dingin a hmai ah an chuak. Ringrawn cu an vun tum cang. Hla lak a za cang nain Pa Thlir cu aa laklawh dih. An nu cu a hei ngiat pah. Cu ah cun an nu pawngah a ṭhu mi tlangval nih an nu cu Beer a thletpiak khi a hei hmuh.

Pa Thlir cu umtu a thiam ti lo. A hlasak zong aa palh lengmang.

“Ka nau, ka liang in vun ka kup ta tuah”.

Cuticun tlangval nih a liang in a vun kuh. Pa Thlir a um kho ti lo, a tawhaiherh a za cang. Hlasak le sak lo a thei ti lo. Hla fungkhat cu an lim phot.

“Nan sak dih ahcun kannih kan sa ve cang lai”.

Pa Thlir cu a lau chinchin. Cuticun caan zeimawzat a liam. Tlangval pa zong cu a rit ngai cang tikah Pa Thlir nupi cu nungak taktak bantukin muaitam a timh cang.

“Hey, Za Thlir, nungak nu hi a zeimalo na tawngh piak tawn si lo maw kha, atu vun tawng rih ca”.

“Ka tawnghpiak bal lo cu aaa, ka tawng bal lo”.

“I pheh hlah, an tawnghpiak lengmang ko lo maw Sandy”.

“Aw, tawnghpiak tawn ko”.

“Na thei maw Za Thlir. Atu zong vun tawng ca. Sandy na zeimalo cu vun tawnghter tuah”.

“Kan nu na ri cang hih, lawi usih”.

“Ka huam loh, na duh le va lawi”.

“Nangmah tel lo cun zeitindah ka lawi hnga. Na um ahcun ka um ve ko lai”.

“A ṭha ko cuh, khah Sandy, na upa cu vun tuaitam ko ne. Kannih zong zalong tein kan va i tuaitam ven cang lai cu”.

“Haha, kan nu! Keimah palh bak si. Zeitikhmanh ah KTV ah ka kal ti lo lai lo. Lawi cang usih. Hey, nang kha, kan nu kha na ngamh ahcun na kutpar zong tawng tuah ca. Na samchia zong kan phoi dih lo ah. Khah, kan nu a za cang. Chimh ka ngai tuk cang lai, biatak tein bia kan kamh, ka biakam ka zulh hrimhrim lai. KTV ah ka kal hrimhrim ti lai lo”.

Cuticun pei Pa Thlir cu KTV kal aa ngol thainak a si cu.

Pa cu midang tikhur huah an huam ngai nain midang nih anmah tikhur an huah ding cu an siang nemmam lo. Cucu pa pawl an zia a si. Cucu Uisihtlang i Uikheng Za Thlir nupi nih i fiang tuk kaw, an pa cu fawitein a remh khawh ko cu teh.

Note: ယောက်ျားတို့၏ အားနည်းချက် kha Laimi zatlangnun hoih in ka lehmi a si.

Zeidah a kan cawnpiak?

==================

Kan nupi, asiloah kan pasal, asiloah kan fale nih an tuah dingah kan duh lo mi thil kha kan tuah ve ding a si lo. Nu le va i pehtlaihnak lawngah a si lo. Zeithil paoh ah!