May 25, 2023

Karenni ramkulh, Demoso peng, Dawhkulia le Tanilale tlangthluan ah ni 10 chung kahdohnak a chuak i SAC lei in Captain rank pakhat le bo hnih rank pahnih tel in 40 leng an thi tiah KNDF nih an thanh.

Karenni ramkulh, Demoso peng Nichuahlei ah a um mi Tanilale khuate tlang cung in Dawhkulia khuate tlang lei ah thazaang tampi he SAC ralkap nih an rak nam hna caah May thla 14 thawk in KNDF he kahdohnak fakpi a chuak i atu bantuk in SAC ralhraang lei an thihnak hi a si.

SAC ralkap LIB-425, LIB-517, IB-287 battalion hna cu May 14 thawk in Karenni Army (KA) KNDF, KNDF-ETD, KNDF-UAV le Loikaw PDF hna i bawm in May 23 tiang an kah hna.

Kahdohnak chung ah Loikaw, Ngwetaung le Hpruso hrambunh SAC ralkap nih ni fatin hriamnam ngan tam tuk kah an bawmh hna i vanlawng in voi 60 nak tlawm lo an kah hna tiah cathanh ah an langhter.

KNDF lei nih kahdohnak chung ah MA-1 meithal zun 8, MA-2 meithal zun 1, MA-3 meithal zun 3, MA-4 meithal zun 1, 9mm pistol zun khat, RPG zun 2, kuanzen tampi, pehtlaihnak seh thilri hna le ralkap hman mi thilri tampi an laak pin ah SAC ralkap pahnih a nung in an tlaih hna tiah theih a si.

Photo: KNDF>>>>>>>>>>>>>>>

Landmine le a puak kho mi raal hriamnam kong ah ralrin peknak

****************************

• Landmine, a puak rih lo mi bomb le kut ser bomb na hmuh ahcun va naih hlah, tawng hrimhrim hlah.

• Ngakchia hna zong nih cu bantuk thil pawl an tawngh lo nakding le lentecelhnak ah a hman lo nakding ah nulepa nih nan cawnpiak hna lai.

• Aa zam mi wire hri na hmuh ahcun tawng hrimhrim hlah, naih hlah, na ke in laam hlah.

• Lunghrin awk a si mi thil na hmuh ahcun lamhlapi in hrial. A hmun i cinken law rammi ralkap sin ah theihternak tuah hna.

Ref: MoHADM