Sagaing ramṭhen, Ayardaw peng Taunghmua khuami 6 cu SAC ralkap nih an thah hna pinah an khua ning in an khangh, tiah theih a si.

May 24 zinglei ah SAC ralkap pawl cu Taunghmua khua ah an lut i, khuami 6 an thah hna leng ah khua zong an khangh caah a khua ning in a ciam, tiah theih a si.

SAC ralkap nih an thahmi khuami 6 chung in kum kum 60 pa 2, kum 60 nu 2 le kum 30 tluk pa 1 an si i, a dang 1 hi mizei dah a si ti hngalh khawh a si rih lo.

“SAC ralkap nih an thahmi hna hi 6 an si. Mei an khanghmi zong an um i, an zamnak ah an thahmi hna zong an um. SAC ralkap nih Kyauipakan khua zong an va khangh,” tiah tualchung mi pakhat nih a chim.

Taunghmua khua cu inn 360 a umnak khua a si i, milu 1,500 tluk an umnak a si. SAC ralkap pawl cu khua chung an luh lio ah khuami cu an zam dih cang nain a zaam kho lomi cheukhat cu an kah hna, tiah tualchung mi hna nih an chim.

SAC ralkap pawl cu May 23 ah Taunghmua khua ah an lut i, phungki sianginn ah umhmun an khuar. Khuami inn le lo an khanghmi zat cazin an laak khawhmi vial ah inn 100 leng a si cang, tiah theih a si.