Chin ramkulh, Matupi-Paletwa lampi cung ah ummi SAC ralkap Thaeboi sakhan ah riahcaw chan ding in Matupi in a chuakmi SAC ralkap nih Kala khua inn 30 an khangh hnu April 2 ah Walantae khua inn 15 hrawng an khangh chap tiah theih a si.

Kala khua ah SAC ralkap an luh lioah tualchung mi hna cu an zaam i SAC ralkap an chuak cang tiah thawngpang an theih hnu inn an kir ah, tarnu pakhat a inn zong khanghpiak a si ve caah, a kang ciami a inn dapcaam zoh in lungfah in a nunnak a liam tiah theih a si.

SAC ralkap hna cu March ni 20, ah Matupi in an chuak i CDF-Matupi nih voi tampi kahdoh in fak ngai hliamh an ton caah atu bantuk in tualchung mi hna umnak inn cu a ruang um lo in an khanghpiak hna hi a si.

CDF-Matupi nih an chimning ah thazaang 150 tluk hrawng he rallam sialmi SAC ralkap chung ah 45 cu kan fimhlawm khawh hna, riahcaw a phurtu kee 10 ngei leilawng pakhat zong kan hrawh khawh tiah an chim.