Kum 35 ka si hlan ah kan umnak Rangoon ah inn dot sang sa kho dingin ka no lio tein thla ka rak cam. Pathian rianṭuantu ka si bantukin chawva tam ngei kho ka si lo i, ka caah hihi Ka chunmang sang pakhat a rak si. Kan pemnak ram i inn lo ṭha dirh i, Pathian a theimi miphun aiawh in Chinland timi min putter hi ka rak duh, atu Chinland Villa/Tower tiah min kan pek.

Pathian nih caan ṭha a hun tlinter i, Tleicia ka nu nih a ka roh tak mi, apartment te ka zuarnak in, innhmun man deng tete ah invest ka rak tuah. Cu ka cawkmi innhmun tete hna cu man sang ah an rak kai, ka thlacamnak philh lo tein, ka zuar hna i, hringtu ka pa Bishop No Chhum thluachuah peknak in inn dot 7 ka sak.

Kan ram nih a ton bal lomi muihnak le harnak kan ton tikah, miphun hawi hna rawlchanhnak caah a ka bawmtu bik pakhat a hung si. Keimah a ka daw i, Ka rianṭuannak ah tel a duhmi nih an ti khawh tawk cio in an i tel ve. Miphun hawi le zumtu a si lomi hna nih i tel an duh zongah ka sianh hna lo.

A van i teltu hna cazin zong zung lei nih ṭha tein an record piak hna. hawile nih an i telmi tluk keimah pumpak phaisa hmangin ka ṭuan ve. Hi kan miphun nih harnak kan ton lioah Pathian rianṭuantu ka sinak in, kan miphun hawi rawl pek, inn lo tete zalhpiak, phaisa lei a harsami hna an phurrit chanh le thlacampiak hi ka ti khawh ve mi rian cu a si. Hi nih hin ka lungfahnak a zorter, ka fale thinlung ah miphun thlaici ka tuh.

inn man lut ding vialte, tu kum chung kan miphun hawi rawlchanhnak ah hmang dih dingin thlacamnak ka ngei. Kan fale a hniang lei pahnih sianginn man deng deuh ah ṭhial khawh kan i zuam lai. Kan ram le kan miphun cungah Pathian venhimnak um ko seh. A mui cemmi caan lioah; kan miphun hawi hna caah tiin. Credit: Saya Thawng Tha Thang