Lungfah Celh Ding Si Lo, Mipi 30 Bak Ralhrang Nih An Thah Hna

Shan Ramkulh Ah SAC Ralkap Nih Tualchung Mi 30 Leng An Thah Hna

Shan ramkulh, Pinlaung peng Namning khua phungki sianginn ah a ummi phungki 3 telh in tualchung mi 30 cu SAC ralkap nih an tlaih hna hnu ah an thah hna tiah theih a si.

Nihin, March ni 12 ah tualchung hriamtlai phufonh nih dirhmi Moebyel central committee nih Pinlaung peng SAC ralkap nih umhmun an khuarnak Namning khua hmunhma thianhfelnak an tuah lioah phungki 3 ruak le tualchung mi 30 ruak an hmuh tiah theih a si.

Namning khua phungki sianginn ah SAC ralkap kut in thah a tongmi phungki 3 ruak le tualchung mi hna an ruak cu hmuh a si. SAC ralkap le tualchung hriamtlai phu kar kahdohnak ah fak ngaiin hliamh a tongmi SAC ralkap hna cu khuachung phungki sianginn ah kal in cuka phungki sianginn ah ralhrial in aa dormi tualchung mi hna le phungki 3 an thah hna.

March ni 11, zanlei suimilam 4:00PM hrawng ah SAC ralkap nih vanlawng le hriamngan hmang in Pinlaung peng Namning khua cu luhhnawh in kahdohnak a tuah tiah theih a si.
SAC ralkap hna cu khuachung an luh hnu ah phungki sianginn ah aa dormi tualchung mi 30 le phungki 3 cu fak tuk in an thah hna. Cu thilcang cu KNDF, PDF le KA phu in ngiathlaitu hna nih an hmuh hna tiah theih a si.

Thah a tongmi hna an ruak cu KNDF nih an laak khawh hna hnu ah biaknak he pehtlai in ruak fimhlawmnak an tuah lai tiah theih a si.