Chimh a harmi hngakchia pawl hi a upat tikah mifim le mi lar ah an i chuah duh: Zumh cu a har ngai nain hi hi kum 9-10 hngakchia 700 cu kum 40 an si tiang zohfel an si hnu ah research nih a langhtermi a si. Chimh a harmi hngakchia paoh hi an upat tikah mi ropui le mi lianngan ah an i chuah tinak si loin a tam u kha a chim hnawh duhmi a si.
A zeimaw hngakchia hna cu an upat tiang an sual hna i mi lo tlau ah an i cang len tawn hna. A tam u chimh a harmi le nawl a ngai lomi hngakchia hna hi an upat tikah mi dang nakin an tuahmi thil ah a teimami le hawi nih teimi si a duh lomi lungput a ngeimi an si hna tiah research nih a chim.
Cu tikah hawi nakin an i zuam i cu ticun rian le phaisa lei ah hawi nakin khuaawng a pemmi an si duh hna. A tam u min thang le mifim hna zong hi an tuanbia dawi ahcun sianginn a rak lim lomi an si hna i saya/sayamah chimh ngai loin mah zumhnak lam a rak zulmi an si deuh hna.
Sifak ruangah sianginn kai kho lo zong an rak um ve ko hna nain a tam u cu mah zuamnak in teinak a hmumi an si hna. Cu caah kan fale hi chimh an har a si zongah strict tuk in velh le hro le hrem phun in ti ding an si hna loh i an duhnak kha zoh thiam piak an si ahcun mi ropui pakhat ah an i chuah khomi a si.
A bikin Lai fa a tam u hi cu a tling cia an si hna i nu le pa nih an lam sial piak thiam lawng kha a tang cang. Reference: Scarymommy(NOTE: Hi capar hi upa chimh ngai lo tha pek duhnak kha a si lo i upa chimh a ngaimi fale a upat tikah mi lianngan ah ai chuahmi an tampi timi cu chim hau lo a si)
Thawngpang dang rel ding a um: Mars cung kainak cu Japan caah cun ai hlat chin lengmang: Japan hi thilri siam lei ah a min a thang ngaimi ram fim a si nain a tu tiangah cun US hi a tluk kho taktak rih loh i kan vawlei nih Nika a helnak a lam cungah rocket thlah ding hi ai zuam cuahmah lio lawng a si rih.
Nizan ah a testmi rocket zong tlawmpal a zuang ah a 2nak engine a rawk i cu caah khuaawng an pem lo kha a si. Hi hi a voi 2nak an test a si a voi 1nak an rak test lio zongah khan an saduhthah a rak tling loh.
Cu caah Japan caah cun Mars telh in vawlei leng fimnak kongah hnu a dawn chin lengmang rih lai tinak a si. A ruang cu Space X le US dirhmi NASA nih Mars cungah a luan cia kum 10 reng lo lio tein khan rocket an thlah khawh diam cang i minung hmanh thlah dingin an i tim cang. A tu Japan nih an testmi rocket hi generation thar a si i a min ah H3 tiah an sakmi a si. A tutan cu an saduhthah a tling cang lai tiah an zumh nain hi bantuk in a rawk ttha cu a si. Ref: Japan Space Exploration Agency