Hi thawngpang nih hin zeitluk in dah kan fa le hi kan zohkhenh hna awk a si timi le a bik in leng kan chuah pi caan hna i thil kan cawk pi caan hna ah hin ralring tein zohkhneh an hert tuk nak kong fiang tein an kan cawnpiak. Australia i a um mi kum 6 lawng a si rih mi Cecilia timi hngakchia nu te cu a pi he dawr ah an kal, dawr i an kal nak ah cun ruah lo taktak in a mit ah hliamhma a tuar i a mit a caw thai dengmang. Hibantuk thil hi kanmah le kan fale cung cio zong ah a tlung kho peng ve mi a si caah i ralrin taktak kan herh.

January 8 hi Cecilia kum 6 a tlin ni a chuahni sunglawi a si caah a duh mi angki caw dingin a pi he cun Chatswood Chase shooping mall ah an va kal. A pi he angki an kawl cuahmah lio ah cun Cecilia nih hin a duh mi angki cu a hei hmuh, a pi sin ah chim loin amah te in a hmuh mi angki cu lak a hei timh.

A duh mi angki an bah nak hi a san deuh vak caah a phan loh, a phanh lo caah a hei i hlawh bu khin angki cu a hei banh nain a tlak lei ah a tang deuh mi angki an bah nak thir cu a va tlak hnawh ciammam i a mit cu a tu na hmuh bantuk khin fak taktak in ai hliam. Ai hliam mi hma ruang ah cun a rak ciammam i mall i a um mi vialte nih cun an van chauh hnih dih i a pi zong cu a lau tuk nak ah a tlu dengmang. Cuticun a rianran nak in sizung ah an tlik pi.

Sizung an phak hnu zong ah mizaw an tam tuk ruang ah caan zeimawzat an hngah hna. Caan zeimawzat an hngah hna hnu ah Sibawi te nih a rianran nak in operation an tuah colh i suimilam 4 chung an rau. Vanchiat vanthat ah Cecilia mit hi a caw lailoh nain a hlan bantuk tein a dam khawh nak ding ah cun caan sau taktak tlawmhbul a herh tiin doctor te nih an chim. Kan fa le he kan i chawh leh tik ah hin biatak tein kan i ralrin i kan zohkhenh hna a hau.