India le Chaina buainak ruangah India cozah cu Social media Company kongah ai ral ring deuh deuh i China nih tuahmi Social Company lawng si loin vawlei cung Social Company zate cu February 25 ah khan ralrinnak a rak pek. Ralrinnak a pek mi cu thla 3 chung a si i May 25 2021 ah khan a dih. India cozah nih social company kongah duhmi a ngei i daanthar zong a tuah.
Cu hna lo paoh cu India ram chungah hman khawh loin kham a timh dih. May 26 zing tiangah India cozah le Facebook cu i remnak an ngei kho rih lo i facebook lei nih cun thla 6 chung caan pek rih dingin an nawl. Cu an nawlnak cu India cozah pi nih rem a ti kho te hnga maw ti lai lo dah a si loah facebook cu a duh tik paohah dah a thah dih hnga tiin mipi cu a thin phang ngaingai.
India cozah nih social company pawl hrang daanthar a tuahmi cu social company zate cozah kut tangah an um lai i a thar ai bawm mi hna cu duh tawkin social company pawl cu cawlcanghnak an ngei kho lai. Cu pinah social company pawl nih India ramchung i an umnak pawl le an sining dih lak cu cozah sinah an chimh dih lai. Cozah nih a duh lo mi le a huatmi cu hlonh piak ding a si i a hlonh piak tu dingah minung zong chiah a si.
A thiltuah mi dih lak cu cozah sinah theihternak a tuah peng lai. Social hmang tu lak ah daan a zul lomi cu cozah sin ah kalpi ding. Cozah nih chiahmi hna he i bawm in social i chiatmi a tha lomi hna cu hlonh le block khawhnak nawl an ngei lai. Cu pawl hna cu a tlangpi in an si hna. Social company ti tikah zapi nih internet hmanin kan hman khawh mi social app zate cu ai tel dih i facebook chungah Instagram le whatsapp zong an i tel dih i twitter zong ai tel ve.
Social company zate hrangah india cozah nih thawngthanh mi a si. I remnak an ngei kho te lai maw timi cu theih khawh a si lo. Cheukhat nih cun VPN hman ning hi i cawn cia usih law a tha lai timi zong an um ve. A sinain facebook cu Chaina social company si loin US hrambunh a si ruangah US le india i pehtleihnak cu a tha rih i i remnak an ngei kho ko lai tiah ruah channak an ngei.
Cu lawng si loin tu dirhmun zongah India ramdang vuanci cu US ramah a um i US cozah he riantuan tinak kong an buai pi cuahmah lio a si. Cu rual in facebook cu US cozah ta si loin pumpak ta a rak si ve. Facebook chung i ai tel ve mi Whatsapp tongh ning thar kong zongah India cozah le facebook cu an i rem kho lo tiah theih a si.