Malaysia-Thailand Ramri Ah Salai Hrang Than Hawl A Nunnak A Liam. Letpanchaung khuami Salai Hrang Than Hawl (30) cu Malaysia le Thailand ramri ah a nunnak a liam, tiah theih a si. Salai Hrang Than Hawl hringtu a pa Pu Biak Ling nih, “Kan fapa cu pum pawcawmnak ca ah Malaysia lei kal aa thawh i tet tuk in motor an i cit caah a thaw a phih i, Malaysia le Thailand ramri ah a nunnak a liam,” tiah The Chin Post ah a chim.

Hi kong ah Salai Hrang Than Hawl Malaysia a kalnak tawlrel piaktu agent nih, nan fapa a ruak cu nan sin a phanh naklai cu a har ko. Zatuak 100 ah 30 hrawng lawng a fiangmi a si caah i ruahchan tuk hlah u, tiin an kan ti tiah Salai Hrang Than Hawl hringtu a pa nih cun a chim.
Salai Hrang Than Hawl ruak phorhtlunhnak asiloah vuinak kong ah Malaysia le Thailand um lai hritlai hna sinah thih loh a tongmi chungkhar nih bawmhhalnak an tuah.

Thawngpang dang: Chin ramkulh, Matupi peng CDF-Matupi hmunram chungah Non-CDM um lo ding in September 22-25 tiang khuate lei ah CDF-Matupi Brigadier le a kuttang ralkap pawl cu an tlawng i, khuami hna he biaruahnak an ngei, tiah CDF-Matupi nih cathanh an chuah.

Brigadier nih Non-CDM pawl cu SAC ralkap an rianhma a kal khawhnak dingah bawmtu an si i, CDF-Matupi nih a uk penmi hmunram chungah Non-CDM tam deuh cu sianginn cachim an si. Atu thok in SAC kuttang rianhma a kal lo dingah CDM tuah ding in ralrin peknak bia a chim, tiah theih a si. Cu pinah Brigadier nih Non-CDM pawl cu SAC kuttang ah rian nan ṭuan rih a si ahcun CDF-Matupi nih ralrinnak an pek cangmi hna ning in a fak bik dantatnak kan in pek hna lai, tiah a chim.