Tikham Nganpi An Kah Caah Mipi An Zamter Hna - TIMES OF CHIN NEWS

Tikham Nganpi An Kah Caah Mipi An Zamter Hna

Ukraine Ral: Tikham Nganpi an Kah caah Mipi an Zamter hna
===============================================
Tikha nganpi pakhat missile nih a khen hnu cun tilian thawh khawh dawhdang a si caah, thlanglei Ukraine khuapi chung mipi himnak ah zam dingin cozah nih a fial hna. Kryvyi Rih pengkulh chung um lampi 22 tluk cu tikham bauh ruang i tilian nih a khuh dih cang, tiah khuabawi Oleksandr Vilkul nih Wednesday ah ralrinpeknak a thanh. Tilian hi second pakhat ah 100 cubic metres tluk cak in a luang i, Inhulets tiva zong tihnung dirhmun tiang a phan cang.

Nai i Russia ralkap ceicikcek in kan dawi hna ruangah Russia nih a tu bantukin lehrulhnak a tuah hi a si, tiin Ukraine nih an chim. Russia hi ‘ralhrang ram’ a si. Mipi a dotu ralhrang nan si. Raltuknak hmun in a zam i, zamnak hmun lamhlatnak in midang fahnak pek a timtu michiakha nan si, tiin Wednesday ah khan Kryvyi Rih khua ah a chuahmi President Zelensky nih a ti hna.
Kharkiv pengkulh i Ukraine ralkap pawl hlawhtlinmi ruangah a tu bantukin lehrulhnak an tuah hi a si. Hi khua hi Russia ralkap pawl an pawnchuah hna nak khua a si. Kryvyi Rih i tikham kahnak kongah Russia nih mipi theih in cukha a ti rih lo.

Kan hnung zarh i Ukraine nichuahlei khuasa minung million tampi mei lo in a chiatu kha kanmah kan si. Mei peknak inn le lo kan kahpiak hna, tiin Russia nih an chim. Kharkiv pengkulh chungah raltuknak a linhsatnakbik khua Izyum lei ah Wednesday ah khan Zelensky a vung phan kho. Khua chuahtak dingin Russia pawl a dironhtu a ralkap hna cungah a lunglomhnak a langhter i, “Kan Ukraine flag (aalan) hi kan ram chung khua le ram kip ah a kir than hrimhrim lai” tiin bia a kamh hna.

Cuhlan i Russia kut a phanmi hmun le hma ah Ukraine ralkap pawl an lut kho cang hna i, Russia nih a buarmi “war crimes” (raldohnak ah buarsomi sualnak) kong hlathlainak zong tam chinchin in kalpi a si cang. Russia nih kan khua an lak lio ah hin khuami pawl police sakhan ah an hrem hna, a cheu le bang cu thong an thlak hna i electric in dah an leihter hna, tiah Balakliya le Kharkiv khuami hna nih an chim.

May be an image of lake, nature and bridge

Mipi kai hmaithlak hrimhrim hna lo, tiin Russia nih ai pheh peng ve. Ukraine ram pumpi i cheunga ah cheukhat tluk hi Russia kut ah a um ko rih i, ral a thawh ka hrawng tein Russia kut a phanmi Donbas chungum khuapi pawl lak than hi Ukraine ralkap nih an i hmuitinh lio pi a si.

Kyiv le a dang khuapi tampi an lak khawh lo hnu ah Russia nih Donbas hi nawlnolh in ai hmaithlak i, a hnarcheu le bang hi cu Russia nih tutan ral a thok hlan tein anmah a tanhtu hriamtlai pawl kut a phan cang, tiah theih a si. Cuhlan kan i tinhmi a tlam kan tlinh hlan tiang mah hi ral hi kan tuk peng ko rih lai, tiin Monday ah khan Russia nih a chim.

Asinain, Ukraine ralkap hma an nuar cutmat in cun Russia ralkap pawl lauh lawng an rian cang i, a cheukhat Russia ralkap le bang cu an uniforms an i phoih i mipi lakah an i thupnawk, timi thawngpang zong a leng ngaingai cang. Nichuahlei khua cheukhat cu kan ralkap nih an chuahtak cang hna, asinain in hihi hnungtolh a si lo. Kadang a ummi kan ralkap pawl he vai fonh duhbia a si, tiin Kremlin nih a chim. A dangtein chaklei Kherson pengkulh ah Ukraine nih counter-attack (lehnak) an tuah lio pi a si. An hlawhtlinnak belte a nuar ngai, tiah theih a si.Credit; Chelsea Bawi

May be an image of map and text that says '6 September Ukrainian gains in Kharkiv counter-offensive 11 September Kharkiv Kharkiv Kupiansk Izyum. Kupiansk Izyum. 20km 10 miles UKRAINE Google Crimea Russian military control A Russian advances Held or regained by Ukraine Russia annexed Crimea in 2014 Source: Institute for the Study of War (21:00 GMT, 11 September)'

error: Content is protected !!