Maw Yah Waddy tiralkap camp in a zaam mi SAC ralhrang minung 12 lakah minung 2 cu an hmuh tthan hna i an kah thah colh hna. Asinain SAC ralhrang nih cun anmah le mah an i kap tiah thawng an zamh.
Kan hnung zarh Zing (September) 14 ni zaan ah Si lei ralbawi tel in SAC ralhrang minung 12 hna cu hriamnam he an zam. Cucaah SAC ralhrang nih cun heh tiah ramtang zong an an kal hna hnu ah Kan Pauk hmun hrawng i a um mi khua pakhat ah ai thup mi 2 hna cu an tlaih khawh tthan hna.
Tlaih a tong tthan mi ralkap zaam mi 2 hna cu camp ah an hruai hna i fak pi in an hrem hna, bia an hal hna hnu ah an thah hna tiah anmah ralkap chung in min langhter duh lo mi nih a chim.
Hlan zong ahhin ralkap chung in an zaam i an tlaih khawh tthan hna caah an hrem hna i an kah thah mi hna an um bal cang tiah a chim chap.Credit:SMLM
Thawngpang dang: Ralbawi hlun Ung Thwun an thah lio ah PDF pawl cu heh tiah a nam chih ve hna caah ralbawi hlun Yea Tay Za an thah colh ve. Ralbawi hlun a si mi Yea Tay Za nih hin a nupi pa ralbawi hlun Ung Dun an thah hnu ah PDF pawl cu thah tim bantuk in ai cir ve caah PDF nih cun an thah colh ve tiah Inya Urban Force nih an langhter.
Tuchun mission hi amah Pu Ung Dun ca bak ah a si, asinain a fanu pasal nih vuak le thah tim bantuk in ai cir ve caah amah zong kan thah colh ve. An inn ahhin midang tampi zong an um ko nain zei ti hmanh in kan ti hna lo” tiah Inya Urban Force in ttuanvo ngeitu pakhat nih cun a chim.
Yangon khua chung hi tluk in security an tamnak hmun ah hi bantuk in SAC ralhrang dirkamhtu thah a si hi a voi khatnak a si ttheu lai dah. Ralkap bawi hlun tampi an um ko, asinain SAC ralhrang hnulei dirkamhtu an si lo ahcun zeihmanh kan ti lai lo.
SAC ralhrang dirkamhtu an si sual ahcun zei bantuk security tthawng mi zong nih veng hmanh han seh, cun zei tluk sinak sang ngeimi zong si hmanh hna sehlaw kan fimhlawm tthiamtthiam hna lai” tiah a chim chap. Tuchun ah an thah mi ralbawi hlun Pu Ung Dun hi tulio ralbawi zik Min Aung Hlaing changtu Soe Win saya a si hlei ah uknak la ding in ruahnak cheutu zong a si fawn.