North Korea nih cun Russia sin ah zei bantuk hriamnam hmanh kan zuar lo tiah official in tuchun ah elnak an tuah. Tu thla thok hrawng ah khan US official nih cun Russia nih Ukraine ram ah hman ding mi Rockets le miakpi tam taktak North Korea sin in a cawk cuahmah tiah vawlei pi theih in a rak langhter. Asinain North Korea nih cun ralthuam zei bantuk hmanh Russia kan zuar hna lo tiah an langhter ve.

“Hriamnam le zenkuan hrimhrim Russia kan zuar lo, cun hi bantuk timhtuahnak zong kan ngei lo” tiah North Korea defense ministry in General Bureau of Equipment nih a chim. “US nihhin daithlang tuk in thil hi langhter ma cang sehlaw a ka i cip seh” tiah a chim chap.

US nih hin North Korea hriamnam zuarnak kongah zei hmanh tette a ngei taktak lo. Russia nih hin a ralkap pawl a duhning in hriamnam an chan kho hna lo, a ruang cu vawlei cung ram hna nih phihkharnak an tuah mi ruang ah a si.

Thawngpang dang : SAC ralhrang bawi Min Aung Hlaing le a ralkap caah hriamnam a zaalh piak tu bik pakhat a si mi pa cu Thailand ram ah palik nih an tlaih hna tiah theih a s. SAC ralhrang caah hriamnam a caw tu palai Tun Min Lat le a hawile minung 4 cu Thailand palik nih an tlaih hna.

Cun an ngeih mi US Dollar 5.4 million man tluk an chuh hna tiah Reuters nih a ttial. Ralhrang caah hriamnam a caw tu palai Tun Min Lat le hawile 4 hna cu rithaisi case le phaisa dum case in tazacuai an si tiah Thailand police chimnak nawlngeitu Kissana Phathanacharoen nih a chim.

Tun Min Lat hi Ming Aung Hlaing he rian a ttuan tti mi chawletnak phunphun Hotel tiang in a tuah tti mi an si. Cun Kum 2019 lio ah Thailand ram hriamnam pholangh puai zongah Min Aung Hlaing hnu a zultu a si fawn.