KNLA battalion 18 le mizapi ralkap fonh hna nih SAC ralhrang camp pakhat cu nizaan ah khan an kah i an tei tiah theih a si. Nizaan Zing 20 ni zaanlei sml 2:02pm bak ah mizapi ralkap fonh nih cun an kah thok hna i sml 2:19pm bak ah camp cu an lak khawh colh.

Cu kahdohnak ahcun SAC ralhrang minung 7 an thi, 2 hliam an tuar buin an tlaih hna. Cun RPG, Sniper telh in hriamnam dang tor le cheng an chuh khawh fawn hna. Hi SAC ralhrang Gyeik camp hi Hniang 8 ni lio te khan riahcaw i chan kho lo ding in an phihkhar cang mi hna le an doh cang mi a si.Credit:S.MilamM

Relchap: Magway ramtthen ah SAC ralhrang bawi pakhat cu a inn ah an luh hnawh i an kah thah tiah theih a si. Nizaan Zing 20 ni ah khan Pakukko khuapi peng khuate pakhat ah SAC ralhrang bawi pakhat cu anu le pa inn ah PDF pasalttha hna nih an luh hnawh i meithal lak ai timh caah kan kah tiah Earthquake PDF nih an langhter.

SAC ralhrang bawi Bo Moe Aung Tun timi pa hi Lasu khuapi lei in nungak pakhat he an rak tlun hnu, PDF pasalttha hna nih hin ni 4-5 chung bak a si ning an ngait ta. Cu hnu ah a nu le pa inn a um lio ah an va luh hnawh hi a si. Asinain meithal lak ai timh caah an kah i an hliamh. An inn hi SAC ralhrang mi check nak gate he ai naih deuh caah an hruai i lampi hmun pakhat ah an thah lawlaw. Hi ralhrang bawi an thah ahhin a thilri ngeih mi Drone pakhat siseh thilri dangdang zong an chuh tiah theih a si.Credit:S.MilamM

Thawngpang dang: Chin ramkulh mipi kilvengtu CDF hriamtlai hna he pehtlaihnak tha kan ngei ko tiah Rakhine hriamtlai AA in chimnak nawl ngeitu Khaing Thu Khah nih September 19 ni ah a chim tiah theih a si.

“Laymyo tiva lei kap ah a ummi CDF hna he naihniam tein pehtlaihnak tha kan ngei ko, asinain raltuknak kongkau ah i bawmin cawlcanghnak tucu a um lo” tiah Khaing Thu Khah nih cun a chim. Rakhine ramkulh chungah PDF an um lo, ramri in kan i pehtlaihnak Chin ramkulh, Magwe ramthen lei ah CDF/PDF hriamtlaiphu hna cu ngandamnak kong le thil dangdang ah bawmhchanhnak kan tuah mi zong a um tiah a chim chap tiah theih a si.