Russia Ralkap Pawl An Thin Lawng A Phang Ko Cang - TIMES OF CHIN NEWS

Russia Ralkap Pawl An Thin Lawng A Phang Ko Cang

Ukriane nih US Hriamnam pawl a Thatzia a Teh taktak cang, US nih Tamdeuh in a HIMARS Kuat Chap a Timh rih Chapbei. HIMARS hriamnam 4 in Ukraine kan kuat chap lai, tiin US Defense Secretary Lloyd Austin nih Wednesday ah thawng a thanh. Lamhla kahnak US hriamnam hi hmual an ngei taktak khi si, Russia nih an celh ruam lo, tiin Ukraine officials nih an thangthat ngaingai, ti asi.

Ukraine Defense Contact Group meeting an tuah lio ah a tu bantukin Austin nih thawng a thanh hi a si. “Kan kuat cia mi kan HIMARS hi Zelensky a ralkap pawl nih hmualngei ngaiin an hman i, ral tei khawhnak dingah a thathnem ngaingai hna,” tiin Austin nih a chim. HIMARS 4 a kuat chap ah cun, a dihlak ah 16 an i ngeih cang lai, tinak a si. Cun, Biden cozah nih HIMARS zenkuan siseh, guided miakpi bomb, raltuknak mawtaw le a dang lakhruat in herhhaimi vialte zong tamdeuh in a rauhhlan ah kuat dingin timhlamhnak a ngei, tiin Austin nih a chim.

HIMARS kan sin a phak le cangka Russia ralkap pawl an thin lawng a phang ko cang, tiin Luhansk pengukbawi Serhiy Gaidai nih Newsweek ah a chim. HIMARS hriamnam hi lamhla kahkhawhnak rocket system a si bantuk in Russia kan dohnak ah thilsining a thleng khotu hriamnam tha a si, tiin Ukraine Defense Minister Oleksii Reznikov nih The Wall Street Journal he interview tuahnak ah a chim ve.

Ukraine nih amah le mah ai runven khawhnak dingah tuanbia chung tial awk tlak tein runvennak hriamnaam pehzulh tein kan bomh ko rih lai, tiin Austin nih a chim. UK sinin M270 Multiple Launch Rocket Systems zong Ukraine nih an hmuh cang. Cun Germany sin zongin hriamnam ngan a phan chom ding a si, tiin Austin nih a chim. “Poland zong nih 155 mm Howitsers miakpi battalion 3 a kuat cang hna.

Cu miakpi pawl cu ralhrahnak hmun ah an i thathnempi ngaingai. HIMARS, M270 le 155mm miakpi pawl hi Ukraine ralkap nih a hman zia an thiam ngaingai manh cang,” tiin Austin nih a chim. UK sinin M270 MLRS cu Friday ah khan kan sin a phan kho cang. Hi hriamnam hi HIMARS he biataktein rian a tlam a tlinh kho ding hriamnam tha a si, tiin Ukraine Defense Minister Reznikov nih a chim. Western nih Ukraine hriamnam an bomhmi kong i an lungre a theihnak kong Russia tanhtu pawl nih an langhter len ve.

Western nih an bomhmi hriamnam Ukraine nih ai hman hnu ah Russia nih a minung le a hriamnam tamtuk a sung manh cang, tiin 2014 lio i Russia a tanh taktaktu khahlan Russia intelligence official Igor Girkin nih the Moscow Times ah a chim. “HIMARS missile an hmual hi Russia air defense systems nih a kham kho ti lo,” tiin Girkin nih The Moscow Times ah a chim. Western hriamnam pawl zeitluk hmual ngei a sinak kong Russia ralkap kong i minthang taktak asi mi, mifim Igor Korotchenko nih a chim bal.

Western nih an hriamnam an kuat chap luaimai rih a si ah cun, Ukraine kan hluhhnawhnak rian hi a tlam tlinh kho lo lakah in an kan tuaitam te lai tiin Kremlin-run TV ah Korotchenko nih a chim. Cu a chimmi cu Russia politic thatlonak kong a thei taktakmi Julia Davis nih Tweeter ah a tar chin, tiah theih a si. Hi kongah Newsweek nih Russia Foreign ministry thawngpang a hal nain lehnak a um rih lo. Chelsea Bawi.

error: Content is protected !!