Kei hi ca ka tial ah cian nawn tein catial ka hmang. A ho mithmai zoh loin catial ka hman caah a ka rem lomi tampi an um ve. Asinain thil dik hi thuh khawh a si lo caah ka hmuhning tein ka tialmi a si. A rem lomi tampi an um lai, asinain tuanbia dik hi thuh nawh khawh a si hlei lai lo.
Tutan CBCUSA civuipi cu Covid a zor hnu ah a hmasa bik tuahmi civui le hruaitu upa ithim kum a si caah voidang civui nak in mi thinlung a cawlcang. Kei zong kan khrihfabu aiawh in meeting kai ding le civui zawh dingah ka va kal kho ve.
Dallas/Fort Worth khuasa Laitlai khrihfabu nih an donmi civui a si. Khual lawngte minung 745 kan si. Khrihfabu 87, US state 26 in kan phan. Rili ral, ram 7 in kan civui an hung zawh ve. Mesquite Hampton inn & Suite timi hotel ah khual tam deuh cu kan i tthum. Khrihfabu nih liam piakmi le mah tein an liammi zong um cio a si. Mah hotel ahcun breakfast, chunchaw le zanriah ei a si. Pumhnak le meeting tuahnak zong mah ka hotel nih an ngeihmi hall khan ah a si I, I thial len a hau lo. Leng chuah a hauh ti lo caah caan kan save i, kan re zong a thei lo. Meting tuahnak le rawl einak khan hi minung thongthum, thongli a tlummi hall khan a si i, a mak lawlaw si ko.
Tutan civui cu Laimi nih international level in civui kan tuah hmasa bik a si lai tiah ka ruah. Dallas ummi khrihfabu 11 fonh nih Civui caah budget $ 200000.00 an thlak i, mah nak in kan luan lai lo” tiah tawlreltu Rev. Zathawngcin Siakel nih a chim. Friday le Saturday kan eimi, Chuncaw le Zanriah cu Dallas khua um khrihfabu nih an chuan i an rak kan put i vui ko in kan ei. An cungah ilawmh lo awk a tha lo.
Zarhpi ni chuncaw a um lomi kha a zai mi tete an um pah. Asinain pumhnak ah mizapi itel dih an duh caah a si lai tiah ruah khawh a si. Civui tawlteltu hna lak ah Rev. Zathawngcin, Pastor Ni Thang, pastor David Cungcin Thawng le Rev.Dr Ceu Lian Thang cu an rethei ngaingai lai tiah ka ruah, dinh caan ngei loin an cawl zungzal ko.
Dallas ka phanh zan in kan ipumhnak aircon a kik tuk I, kik nih a ka tlaih cu ka or a faak, I ka khuh tuk ah nawsen ka hnuk. Medical Team an um I, ka mawnu, San San le Venus nih an hruai hna. An khuh si nih an kan nunh. Inn ka phak tiang a ka zawt phah.
Pumhnak hi zan chiarte tuah kel in tuah a si tik ah a boring deuhmi a lo tiah ka hmuh. Keimah duhning ahcun mino nih zan khat, nubu nih zan khat le zapi nih zan khat tibantuk in caan hman siseh law mino zong tam deuh an chuak lai, kan nule pawl zong an lungdi a riam deuh hnga. Phungchim thiahmi hna hi mino lawngte si loin Kan pale Rev.Dr.Hre Kio tibantuk hi cu kan miphun biaro vuih tu dingah caan pek ding an si tiah ka ruah. Hi hnu kum 4 ahcun an ngamdamnak zong nih tlinh lo kho men cang. Mah cu a lungsia a herh ngaingai.
Praise and worship a kan hruaitu hna an I biatak, a hruai zia zong an thiam. Mino le upa ti loin kan thinlung an laak khawh ngaingai. Emily Ngun Hlei Sung cu hlasak a thiam lawng si lo, hla hruai zong a thiam, a aw tha, a aw a dawh I, a biatak caah mi thinlung a kan laak dih ko.
Mizoram lei khual lian pahnih kan ngei. Lairam Jesus Christ Baptist Church (LIKBK) hruaitu, Rev.B.Zazawna Lai le Mizoram Zirlai Pawl, MZP) president Lalnunmawia Pautu an si. MZP Lalnunmawia Pautu nih Mizoram um Laitlai ralzam hna an bawmhnak hna le an temtuarnak kong le biatak tein bawmh an herhnak kong a chimmi nih mi thinlung a khehkhuai ngaingai.
Rev.Dr.Duh Kam nih CBCUSA hruaitu a tuan lio ah Bawipa nih vision a rak pek i, khua chak le khua tlang, Laitlai viate miphun khat kan sinak le khrih ah pum khat kan sinak fehter chinchin dingah a rak sersiam mi kha atu lio Mizoram ah a zaammi kan miphun hawi hna nih a theipar nan tem tiah ka zumh. Mah zong cu a theithiam lomi hna nih faak tuk in Rev. Dr.C. Duh Kam cu rak soisel a si. Asinain atu ahcun a phichuak a lang ngaingai.
Laimi hi hruaitu thimnak phunphai cu kan I ziak kho rih lo. Democracy kan duh nain zapi duhnak ihrawm kan I harh ngaingai. Kan duhmi nu/pa a tlin lo ahcun a phunphun in soisel le midang mawhchiat kan hmang. Thutdan kan hei duhning, kei cu kum cu zet ka tuan cang ko I, midang nih tuan ve cang hna seh” timi thinlung kan ngeih khawh loning, ningzah zong kan hei theih loning. Kan biachim te hna duh a nun loning, a ngiar bak in mi kan hei ngiar ning.
Hruaitu hlun le midang credit pek kan hei duh loning, pulpit cung in mah le mah credit pek kan hei duhning. Kan I seichiah ning, a fim bik le a thiam bik ah kan hei I ruahning, bu chungah mah le party phun in phu kan hei serning te hna ka hmuh ah hruaitu cheukhat cu ka lung bak an dong. Mi mit hrimhrim an kem tuk. Mi zei an rel lonak, an i wah nak, an I sehchiahnak le mi soisel an thawnnak nih anmah lila an thlak hna tiah ka hmuhning a si. A hlei in khrihfabu hruaitu hna cu tangdor tein mipi a kan hruaitu ding an si. Dawtnak le zawnruahnak he mi hruaitu ding an si. Bawi bantuk, Dictator bantuk in mi lu cung in mipi an kan hruai ding a si lo. An rem lomi hna chonh cu chim lo, kut tlaih zong an duh hna lo. Cu nih cun maw Bawipa rian kan tuan an hei ti ve?
Van sungh le cangka, election committee pawl an dih lo e, bual chung in an kan chuah ee” an hei ti rih, a ngaingai tiah mipi cheu thum cheu hnih nih election committee hna riantuan ning in kalpi kan duh tiah cheu thum cheu hnih reng lo nih dir in an langhter. A ngaingai tiah cun floor in kai khawh thiamthiam a si ko. Floor zong in nan I cuh thiamthiam ko. Zei poah va si ai kun, mipi thimfung thlakmi cazin khi zoh ulaw mi zeidah mipi nih hruaitu caah an duh timi khi fiang tuk in a lang. Thimfung pa hnih khat lawng si lo, thimfung 120 renglo pi in an I thlau. Mipi duhnak cohlan thiam hi Bawipa duhnak zong a si lai ka zumh.
Tutan hruaitu thim thar mi tete hi mino tampi an I tel caah ka lawn khun. Kan pale nak in mirang holh an thiam deuh, IT lei thiamnak ah an smart deuh. An tluak zong a rang deuh. International level in riantuan kho ding lawngte an si. Miphundang he riantuanti ding zongah a sol lomi lawngte an si. Mi cung cuan a timi an um lo. Mi tangdor tete, Bawipa a ttihmi tete an si hna. Mino lei in Vice President caah Dr. Rev. Ronald Charles Nun Uk, Assit General Secretary Dr. Hrang Hlei, Rev. Zathawngcin Siakel ka lawmhpi tuk hna, ruahchannak tampi ka ngei. General Secretary thimmi Dr. Rev. Ceu Lian Thang cu Pathian ttihmi, mi tangdor, mifim, sifak santlai lo a dawmi, mi lungnem, aho he hmanh tluntla tein a um khomi, aho he hmanh a si bal lomi a si. Bawipa nih lam hruai hna seh.
Atu tiang hi cu bu chungah mah le kawi chang, mah le neihniam deuh timi lungput hi cu kan kal taak kho rih lo, mah cu ka lungtha lo bikmi a si. Bu caah a fitmi, a smart mi hna nih aho an si ah an tuan ding a si timi hi kei ka dirhmun cu a si. Asinain hi hnu kum 4 ahcun term khat lawng tuan a si cang lai caah hruaitu icuh kalhnak a tlawm ngaingai te lai I, politic thurnawn zong a tlau ngaingai te lai.
Tutan solo sami lak ah Kathy Bawi Tha Sung kha ka hngalh bal lomi ahcun a thiam bik si lai ka ti. A aw puan, hlasakthiam, a biatak tik ah mi thinlung a laak khawh ngaingai.
Kum 20 renglo ka hmuh ti lomi ka hawile zeimawzet ka va hmuh hna I ka lawm ngaingai. Kanmah thi hi khoika paoh ah hruaitu an rak si pah dih cang. Kan kum upa ziahmah I kan cal a ngau ziahmah ve. Ka hawile cheukhat an fale cu Collage kai lio le a dih cangmi tampi an rak um I ka lawm ngaingai. Minung kan chan hi a tawi tuk caah kan caantha hna hi sullam ngei tein hman thiam a hau.
Rev. William Khen Chum Bik [ Ph.D Candidate] nih Rev.Dr.Hrang Hlei he mirang rawldawr ah rawl thaw taktak a kan dangh i mah cu tutan civui ah ka lunghmuih bikmi pakhat a si ve. Vawleicung ram rum bik, ram tha bik le ram thawng bik ah Bawipa nih a kan chiahmi ka ruah tik ah Bawipa nih kanmah ca lawngah si loin midang ca zongah a thum al ve ding, santlai ve ding le miphun le ram ca zongah thahnem santlai si ve dingah a kan tinh piakmi a si. Cubantuk cun CBCUSA zong cu Bawipa nih kan miphun chanh chuah tu dingah a hlankan in an timhtuahmi bu a si lai ka zumh fawn. Bawipa nih CBCUSA cu kan miphun le a ram kauhnak caah hmang chin ko seh. By Salai Lairamthang