Aung San Su Kyi cu, a hlan bantukin inn chung ah hren ti lo in thong thlak ding in le ramkhel kong ah teltum khawh ti lo dingin Min Aung Hlaing nih nawl a pek cang, tiah theih a si. Aung San Su Kyi cu NayPyiTaw biaceih zung sang deuh ah a sualnak ceihpiak dingah an ṭhial i, a sualnak bia an khiah piak hnu zongah inn chung ah hren ti lo in thong thlak ding in Min Aung Hlaing nih, nawl a pek hna, tiah theih a si.

“Aung San Su Kyi cu thong thlak ding, ramkhel kong zongah tel kho ti lo ding in Min Aung Hlaing nih nawl a pek hi a si. Min Aung Hlaing nih Aung San Su Kyi cungah huatnak le thinhunnak a ngei. Ahmai hmuh zong a duh lo.

Bia an khiah piak hnu zong in a thih tiang thong chung ah um beh ding dirhmun a si ko,” tiah SAC ralbawi he naihniam thawng pakhat nih a chim. NayPyiTaw thonginn ah chiah ding a tawlreltu hi Minister of Home Affairs Soe Htuat a si.

Aung San Su Kyi taza cuainak kong ah Min Aung Hlaing le amah lawng an si. Min Aung Hlaing nih nawl a pek ning in a tuahmi a si, tiah theih a si. “Min Aung Hlaing nih Aung San Su Kyi a chawnh biak ning zong a hlan ralbawi hna nih an chawnh biak bantuk si loin hmurka hrang in a chawnh biak cang.

Min Aung Hlaing a thih hlan tiang nawlngeihnak amah nih tlaih peng ding aa tim ko,” tiah SAC ralbawi he naihniam thawng pakhat nih a langhter. SAC nih hihnu kum 20-30 tiang nawlngeih peng ding an i timhmi hmuh khawh a si. Chawleh chawhrawlnak, ramkhel le upadi lei zong tlaih dih an i tim. Aung San Su Kyi a thih hlan lo cu nawlngeih peng ding an i tim ko, tiah SAC he naihniam mi thawng sin in theih a si. Crd: The Chin Post