Magwe ramṭhen, Myine peng, Gaitawmah khua lei ah rallam a sial mi SAC ralkap hna cu nihin May 12 zaanlei ah bomb puahhnawh an tong i, ralkap sawmthum le pa nga an thi, tiah theih a si. SAC ralkap motor 7 le minung thazaang 150 hrawng nih zulh mi rallam sialtu hna cu Myine peng le Poah peng aa tonnak Netat khua pawng an phak, an i dinh lio ah bomb puahhnawh an si, tiah Myaing PDF in ṭuanvo ngeitu nih a chim.

“Kahdohnak ah meithal zunkhat hmanh kan puah lo nain SAC ralkap sawmthum le pa nga hrawng an thi, a hlankan te timhtuahnak in bomb puahhnawh an si, bomb puahhnawh an ton hnu ah motor 2 in ruak cu an thiar hna,” tiah ṭuanvo ngeitu nih cun a chim chap.

Thawngpangdang…….. Myanmar Defense Force(MDF) nih vanlei ralvennak, rifle 6.6 kuan hmang mi, hmunhlat kahnak ah hmanmi rifle phunkhat kan ser mi cu a hlawhtling cang, tiah cathanh an chuah. Vanlawng kahnak taktak bantuk in a thawng mi cu a si lo nain, ṭhathnemnak tampi a ngei, tiah an chim.

“Zeitluk hlat tiang dah a kah khawh cu fiang tein chim awk a ṭha rih lo. Zeiruang ah ti ah cun zei tluk tiang a kah khawh kan chim ahcun cunak hlat sang in vanlawng an zuang sual lai. 1km nak sang tinh mi hmun cu ṭha tein a kah khawh,

hi hriamthil hi voi tampi zohchunhnak tuah in a tlamtlin hnu ah kan langhter mi a si,” tiah Myanmar Defense Force(MDF) in ṭuanvo ngeitu pakhat nih a chim. “Kan ser mi hriam cu vanlawng kahnak taktak bantuk in a thawng lo na in, hriamthil tampi he hmunkip in ṭan khawh ahcun a ṭhawng mi hriam a si kho,” tiah a chim chap. Crd: The Chin Post