Nihin May 18 zanlei sml 6:00 hrawng ah Hakha Cawbuk sang, SAC ralkap gate ah meithal thawng le hriamngan thawng a thang, tiah kan theih. “Meithal thawng cu voi 100 hrawng a si ko lai, hriamngan thawng zong voi tam ngai a thang. SAC ralkap nih tlerh khawnnak ah an puah sawhsawh mi cu a si lai lo. Tlang lei zong in an puah len, tiah Cawbuk sang ummi pakhat nih The Chin Post ah a chim.

“Meithal thawng le bomb thawng hi minutes15-20 hrawng a thang lai. Meithal thawng a than lonak sau ngai cang. Tlerhnak sawhsawh ah an puahmi a si lai lo. An i kap ko men lai,” tiah Cawbuk sang um vemi pakhat nih The Chin Post ah a chim ṭhan. Loklung khuami pakhat nih,

“Meithal thawng le bomb thawng cu voi tam tuk a thang. Meithal thawng kan theih lonak a sau ngai cang. Ruah lo piin voitam ngai kan theih ṭhan tikah kan lau ngai ko,” tiah a chim. Zan sml 9:43 in 10:00 tiang zong ah Hakha khuachung ah bomb thawng voi 6 a thang tiah rih tiah theih asi. 

Thawngpangdang……… Magway ramṭhen, Htilin peng Semintaw palik camp in palik pakhat cu a meithal he PDF Htilin sinah a lut, tiah PDF Htilin nih cathanh an chuah. Cu palik pa cu M-13 meithal zun 1, kuanbawm 2 le meithal kuan 65 he PDF Htilin sinah aa fonh, tiah theih a si. Palik pa nih nan sinah ka rak i fonh lai, tiah a kan pehtlaih bak in a chungkhar pawl cu kan va auh hna i a himnak hmun ah kan chiah hna. Hriamnam he kan sinah a rak i fonhmi palik pa cu sing 50 lawman kan pek, tiah PDF Htilin nih cathanh an chuah. Crd; The Chin Post