Ralhrang Hna Andirhmun Acep Chin Lengmang. - TIMES OF CHIN NEWS

Ralhrang Hna Andirhmun Acep Chin Lengmang.

MOSCOW, RUSSIA - JUNE 23: head of Myanmar's coup regime, Gen. Min Aung Hlaing speaks during the 9th Moscow Conference on International Security in Moscow, Russia on June 23, 2021. (Photo by Sefa Karacan/Anadolu Agency via Getty Images)

Naitan February 12/2022 ah an tuahmi Unionday ah Min Aung Hlaing biachim mi ngai tikah tlangcung hriamtlai bu he remdainak ser kha abiapi bik ah achim. Cuhlanah arak chimbal lo mi bia achim mi cu; ri khiah lo in ramkhel kong kan iceih lai timi bia hi a si. Aluancia caan ah ramkhel kong an iceih mi zohtikah ralhrang pawl ‘ri ‘ khiahmi tang lawngah rak iceih asi tawn. A umtuning cu ‘ri’ kan khiahmi lawngah kan iceih khawh ,’ri kan khiahmi ah nan hna atla lo ahcun um ko uh, ‘tikhi an kalpi peng i,’cu an ri khiahmi tanglawng te ah cun rak iceih asi tikah nang ceipa kei va rit ti lengmang ah kan tla. Cucaah atutan MAH nih ‘ri’ khiah lo in ramkhel kong kan iceih lai a timi hi ‘cuhlan kan iceihmi nak sang deuh in kan kal lai ati duhnak a si.

Cuhlannak sang in ‘ri’ khiah lo mi ramkhel kong kan iceih lai a timi hi thencheunak policy hman aduh caah a si. Ralhrang pawl an tinhbik mi cu NUG – PDF le tlangcung hriamtlai phu hna thencheu hmasa hi a si, Cucaah tlangcungmi he remdaihnak ka ser khawh ahcun NUG le PDF hi fawi tein ka tei hna lai a ti caah tlangcung hriamtlai phu ra uh ‘ri’ khiah lomi ramkhel kong kan iceih lai ahun kan tinak hi a si. Asinain tlangcung hriamtlai phu pakhat zong nih an hna atla pi loh. Cucaah cuhlan arak hman tonmi phu khat he remdainak ser in phu khat va tuk hna timi strategy kha atlamtling tiloh, Hihi aral sunghnak ngan taktak asi teh lai.

Hriamnam thatha alak tonnak Russia le Ukraine ral an thawh caah cuhlan bantukin hriamnam alak khawh ti lailoh. Cu chinchap ah ralhrang bawi pawl nih Russsia ramah an ichiahmi phaisa zong chuah khawh lo in thawngtla dirhmun bantuk asi tikah an thaw apit ter chin.Ralhrang pawl ruahnak ah Russia le Ukraine raltuk nih hin Vawlei pi nih Kawlram lei an rak hoih mi kha R le U lei ahoih lai i, cu nihcun kan lam a awn ter deuh lai ti an ruat nain, anmah lam pit chinnak tu ah aa cang.

Naitan ahkhan China Tuluk nih NUG foreign Minister Daw Zin Mer Aung sinah PDF nih gas pipeline hi rak kan hrawhpiak hram hna hla seh,tiah nawlnak an tuah. Hihi ralhrang pawl caah cun apa nih afa kha san natlailo tiin ahlawt mi bantuk khi a si. Khelkhat in kan chim ahcun China nih hin MAH ka gas pipeline hmanh na veng khawh lo caah chawnh awk nai tlak lo tibantuk khi a si. Cucaah ralhrang pawl nih hin mah tluk ralkap thazaang an iphazo lo bu hin China pipeline hi ven chih an hau. aruangcu an ven khawh lo ahcun China nih akan hlawt lai tihi an phang . Hihi atulio ralhrang pawl an lu ari taktak mi pakhat asi ve.

MAH ai ruahnak ahcun ral atei lomi ralbawi hi ka tlongh hna lai i, ral ateidingmi ralbawithar ka kaiter hna lai ti hi a si. Cucaah ralbawi hlun zeimawzat ahlonh hna i ralbawithar akai ter hna. Asinain ralbawi thar akai mi hna nih ral kha an tei deuh hlei loh, Chinchap ah ralbawi tam ngai nih an zamtak chinchap rih. Hihi MAH caah cun akut pakhat akiak mi bantuk khi a si.

Naitan ah Arakan Army /AA nih Arakan duhning in ramleng mi he ibawmh in ram kan dirh lai, ‘tiah statement an chuah. Kanmah tein Inndang kan chuak lai ti khi MAH thawng an hun thanh mi a si. AA nihhin ralhrang hna hi an kap hna lo nain an politics kalpi mi hi ralhrang caah cun voksa hang a sa taktak mi aidin sual i, chak ah le zoh a chiah caah alemh chih i achung vialte akangh dihmi bantuk khi a si. Cucaah AA nih ralhrang hna hi an kah hna lo nain, an kalpi mi politics nih hin MAH chingril hi fak ngaiin a kangh ter.

Nihin tlangcung mi ral kan tukmi zohtikah cuhlan nakin teinak tam deuh kan hmuh, Kan ral zong atha deuh,,,cuhlan nakin kan ilungrual deuh fawn, Khattalei ah PDF le CDF hna zong cuhlan nakin raltuk an thiam deuh,,,an meithal zong duhsa in athangcho chin lengmang. Tlangcung hriamtlai phu le PDF kan thawn chin lengmang tikah, ralhrang pawl caah cun thlankhur he an i naihchin lengmang nak asi caah, ralhrang pawl an lu ari bikmi cu mahka zawn te hi a si.

Atulio ralhrang hna an dirhmun hi a lamkip in a cep chin lengmang cang. Kan pupa hna nih pawpi rawltam sa a seh khawh ti lo mi khi athih lai ahcun a sual khun an ti bantuk in ralhrang pawl hi an sual chin thluahmah. Hihi an thih nak thlankhur an naih chinleng mang caah a si.

Cucaah atulio ralhrang pawl an hrang chin lengmang mi hi tihnak le lungdongh nak ah hmang lo in teinak lam kan i naihchin lengmang cang ti tu in lung thawnnak he hmai hnor chin ko usih. Teinak thantar kan lak khawh dengmang cang. Credit: Van Neih Thang

error: Content is protected !!