Ralhrang he ai rem mi Shan hriamtlai RCSS hriam tampi he zeimawzat tlaih an si. Shan ram ah hriamtlai in a um ve mi RCSS hriamtlai phu cu an hriamnam zei maw zat he an tlaih hna tiah theih a si.Shan ram chaklei ah hriamnam he a um ve mi RCSS hna cu Shan ram hriamtlai phu tthiamtthiam SSPP timi phu nih minung 1000 tluk he an kah hna caah an hriamnam tampi le phaisa tampi he an tlaih hna.
Rabawi San Khe hruaimi RCSS hi Min Aung Hlaing nih uknak a fir hnu in Shan ram chaklei ah a rak kai mi an si. Hi hna pawl hi an hrambawngh ding hi kan i tim lo, Shan ram thlanglei ah i tthial dingin kan ti ko hna, asinain Min Aung Hlaing he remnak ser in Pyi Thu Sit dirh an i timh caah kan kah hna nak hi a si tiah SSPP in chimnak nawl ngeitu nih a chim.
February 8-9 kahdohnak ah RCSS i an hriamnam vialte hna le phaisa le minung zong an tlaih hna le an chuh khawh hna hi a si. Hi lio ahhin MAH ralhrang pawl nih RCSS lei ah ttang in vanlawng in SSPP pawl cu an kah bawmh hna tiah a chim chap. RCSS hi SSPP lawng siloin TNLA he zong ai kap lengmang mi an si.
Salai Ram Tinthei cabia. Chin Miphun Ni cu tutan ah sunglawi takin kan hmang lai. Micheu nih hitluk ramchunglei khuaruahhar vansang au in an um lio ah, Chin Miphun Ni hna cu nan tuah tiin an kan soisel pah. Aw an vai ifiang lo ve ka ti. Chin Miphun Ni hi nuamhsaih puai le tlabulbal in picnic kal bantuk, hawikom rual road trip kal menmen bantuk phun ah tuah sawhsawhmi asilo. Chin Miphun hna i kan nisunglawi, kan pupa hna nih lungrualte in ramukbawi uknak cu zauk phung in rak thlen ni, Chin miphun kan identity a langhtertu, kan tuanbia thatha, kan laam dawhdawh, kan hlabia thatha hna le zohcimlo kan thilthuam hna hmuhsaknak, le Chin miphun lungrualnak ah caan hmanmi nisunglawi asi.
Atulio kan ramlei dohthlennak kong he pehtlai in tampi program chungah kan khumh; Australia politician le Cozah lutlai tampi kan sawm hna i cu pawl zong nih kan sining thei chinchin hna seh ti saduhthah asi. Kan mino hna nih kan ramlei ah zeidah a cang timi thei chinchin hna sehlaw, kan miphun sinak ifian in ipekchanh duhnak lungput ngei hna seh” ti saduh thah asi fawn.Australia Perth khua ah Covid pulrai ruangah le, kan duhmi hmunhma kan hmuh khawhlo ruangah, tuzarh zarhteni Feb 12 ah kan hmang chung lai. Live zong kan thlah lai caah rak kan zawh ve hram uh. Eidin phunphun zong kan zuar lai i, kan ram lei CDF kan ralkap hna caah asi lai. Credit: Ram Tinthei