Ralhrang minung pahra an thah tthan hna. Tamu, GTHS ah umhmun a khuarmi ralhrang kawlralkap hna le Tamu PDF battalion 4,2 le BSO le ABSDF fonh hna cu February ni 16 in February ni 17 tiang tukdoh kahnak voihnih a chuak i ralhrang kawlralkap lei in ralbawi pakhat he minung pahra an nunnak a liam tiah TSG nih an thanh.

Tamu le Kalay lampi ah a ummi GTHS sianginn kulh chungah umhmun a khuarmi ralhrang kawlralkap hna cu Tamu PDF battalion 4 nih February ni 16 zanlei suimilam pathum le cheu in pali le cheu tiang an kah hna. Hi ni i kahdohnak ralhrang kawlralkap bawi pakhat telh in minung pali an nunnak a liam i minung pathum hliam an tuar tiah theih a si.

Cun nizan February ni 17 ah ralhrang kawlralkap hna nih hriamnam ngan in voi 50 nak tlawmlo an kah hna i, Suimilam 12 le cheu in zanlei suimilam panga le cheu tiang kahdohnak a chuak. Kahdohnak ah Tamu PDF battalion 4, 2, BSO le ABSDP hna nih ralhrang kawlralkap minung paruk an thah tthan hna i, minung tampi hliam an tuar tiah PDF Battalion 4 nih an thanh. Kahdohnak ah PDF lei cheukhat zong hliamfak lo a tuarmi an um tiah theih asi.

Thawngpangdang, Good News. Mipi ralkap pasalttha hna nih ralhrang kawlralkap minung panga an thah hna. Pakhu, YiGyi khua in Tazatmaing khua lei ah a kalmi ralhrang kawlralkap hna cu February ni 17 zanlei suimilam pali le cheu ah Phoenix DF (Nattalin PDF) nih bomb in an thuat hna i ralhrang kawlralkap minung panga an nunnak a liam tiah thanhnak an tuah.

Nattalin PDF nih ralhrang kawlralkap bomb an thuatnak hna hmun le hma ah ralhrang kawlralkap chungin minung pahnih a thi I, minung pathum ruak zong ralhrang kawlralkap hna nih an lak tiah Phoenix DF timi Nattalin People Defense Force nih zapi theih in thawngthanhnak an tuah.