ZAANGFAK TUK AN SI EE, THINLUNG NIH A CELH HRIMHRIM LO - TIMES OF CHIN NEWS

ZAANGFAK TUK AN SI EE, THINLUNG NIH A CELH HRIMHRIM LO

Mandalay ramṭhen, Mogok peng, Pingpyit khua ah a um mi primary sianginn cu ong ding in ralhrang nih an theihter hna i, an on tik zong ah Sianginn a kai lo mi cu ‘nan inn kan khangh lai,’ tiah ralhrang nih hramhram in a kan ti, tiah khua mi pakhat nih a chim. Sianginn kai ding in kum a tling cang mi pohpoh cu sianginn nan kai lai.Nan kai lo ahcun nan inn kan khangh lai.

Phunghram 505 chirhchan in tlaih nan si lai, an kan ti,” tiah khua mi pakhat nih a chim. January 21 ah Pingpyit primary sianginn uk(Head-master) Daw Pan Nuh Kyay le cachimtu pawl cu Mogok khua i ralkap bawi le Pingpyit khua ah a um mi ralkal senthum Zaw Naing Thun nih sianginn ong ding in an chimh hna, tiah theih a si. Sianginn headmaster cu CDM a tuah mi a si i, sianginn na on lo ahcun kan in tlaih lai an ti, tiah khua mi pakhat nih a chim.

January 22 ah Pingpyit khua cu ‘innkhat minung pakhat meeting kai ding, a kai lo mi cu dantat nan si lai i nan inn kan in kharpiak hna lai,’ tiah ralhrang nih hramhram in an ti hna. Meeting tuah lio ah khualuh le khuachuah lam cu an khar i, sianginn kainak ding ca ah committee an dirh. khuabawi zong a thar in ralhrang nih an thim, tiah theih a si. Sianginn headmaster zong thlahlawh hlam ding in an chimh pinah a Identity Card zong an laakpiak tiah theih a si.

Ralhrang nih hramhram in January 24 ah Pingpyit khua primary sianginn cu hun a si i, sianginn aa ap mi minung 120 hrawng an si. Cu chung in minung 30 hrawng lawng sianginn an kai, tiah khua mi pakhat nih a chim. Pingpyit khua cu Mogok in meng 8 aa hlatnak ah a um mi khua a si. Mogok khua chung ah a um mi siangsangrun pali cu on a si cang i siangngakchia dihlak uniform hruk lo in an kai, tiah theih a si. Credit: The Chin Post

Mon ramkulh, Non-CDM cozah rianṭuan zung a kai mi hna cu Covid raikham sii an i chunh lo ahcun an chungkhar chung in cozah rianṭuantu cu dantat a si lai, tiah ralhrang nih an hro hna tiah Non-CDM chungkhar hna nih an chim. Ralhrang nih Non-CDM chungkhar hna cu duh zong duh lo zong ah Covid raikham sii nan i chun lai tiah an hro peng hna, tiah theih a si.

Raikham sii an i chunh lo ahcun cozah rianṭuan hna cu an rian in dinhter tiang le an laksawng/thlahlawh zong pek lai lo tiang in an hro hna, tiah an chim. Zung a kai mi chungkhar chung in mi pakhat nih cun ralhrang pawl hi kan zumh hna lo caah Covid raikham sii hi kan i chun duh lo, tiah a chim ve. Myanmar ram ah cun January thla a hnubik zarh tiang ah Covid raikham sii a chun cang mi cu minung 2,100,000 leng an si cang, tiah ralhrang ngandamnak zung nih an thanh. Credit: The Chin Post.

error: Content is protected !!