Ralzaam Umnak Sakhan Cu Bomb An Thlak Caah Tazacuai A Si Tiah Karenni Palek Nih Cathanh Chuah! SAC ralhrang nih Kayin ramkulh Demosu peng nitlaklei Nan Mee Khung le Pha Suh Suu peng chung Ri Khi Gu khua chungum ralzaam mipi umnak sakhan cu vanlawng in bomb a thlaknak kong he pehtlai in tuanvo ngeitu hna cu dothlatnak tuah in tazacuai dingin (KSP) nih cathanh an chuah hi a si.

January 16 zaan caan ah nawlngeihnak latu SAC ralhrang nih kahdohnak a chuahlonak Demosu peng chung nitlaklei Nan Mee Khung hmun cu January 17 zinglei caan ah siseh Pha Suh Suu peng chung Ri Khi Gu khua chungum ralzaam umnak sakhan cungah bomb thlaknak kong he pehtlai in (KSP) nih atu bantukin cathanh an chuah hi a si. SAC ralhrang nih atu bantukin bomb a thlak ruangah Nan Mee Khung hmunhma ah zatlang bawmnak peknak ah a telmi kum 14 le kum 16 le kum 17 mino (3) hna cu an nunnak a liam.

Ralzaam umnak sakhan bomb thlak ruangah kum (12) minung telh in nu pahnih le pa pakhat nunnak a liam tiah theih a si.Vanlawng hmangin bomb thlak hnawh le kahdoh a tongtu ralzaam umnak sakhan cu Dec 24 ah khan SAC ralhrang nih sualnak ngei lomi mipi hna cu ningcang loin a tomtom in thahnawnnak a tuahnak hmun Pha Suh Suu peng chung Muu Suu khua in a rak i thialmi ralzaam umnak sakhan a si tiah theih a si. SAC ralhrang nih cuka Mu Suh Su khuami (30) lengkai hna cu tlaih hratin motor cungah meikhangh in an thah tiah Karenni phu nih cathanh an chuah hi a si. Credit: TFT