Good News! Ralhrang An Mah Le Mah An I Kap Than, A Thi Mi Zong An Um - TIMES OF CHIN NEWS

Good News! Ralhrang An Mah Le Mah An I Kap Than, A Thi Mi Zong An Um

PoundDe Khuapi Ah Ralhrang Anmah Le Anmah An I Kap!

Paku ramṭhen, PoundDe khuapi ah January 10 zing suimilam 3:00 hrawng ah ralhrang anmah le anmah an i si i, an i kap, minung 2 an thi tiah khua mi hna nih an chim. Anmah le anmah an i kahnak ruang in minung pakhat cu a hmun ah a thi colh i pakhat cu siizung a phak hnu ah a thi, tiah an i kahnak pawngkam a um mi pakhat nih a chim.

Khua mi pakhat nih, “Nihin zing ah thilzuartu pakhat cu ralhrang pakhat nih a zu rit pah bu in ‘dir’ a ti i ‘zeiruangah ka dir lai’ tiah a ti i, a zaam taak. Ralhrang pa nih cun a zaam mi thilzuartu cu a kah. A dang ralhrang pakhat nih ‘zei ruangah dah a herh lo ah meithal cu na puah’ tiah a sik. An pahnih in cun bia an i al i ṭhen khawh an si ti lo, meithal in pakhat le pakhat an i kap,” tiah a chim.

Nihin an i kahnak ah hliam a tuar mi zong an um rih tiah kan theih, fiang tein cun kan hlat kho rih lo. Thilzuartu cu hliamhma pu lo tein a zaam kho, tiah theih a si. Anmah le anmah an i kahnak in an thihnak kong cu ralhrang phu lei nih thawngpang thanh lo in an thuh i, khuachung ah a lutchuak mi hna cu an check hna tiah theih a si. DVB. Credit: The Chin Post

Relchih >>>>>> Jesuh A Ra Zau Lai, Timh Cia Tein Kan Um A Herh
××××××××××××××××××××××××××××××××××××××
Jesuh nih cun, “Ngaihmanh ka ra zau lai. Mi kip an rianttuanning cia ah pek awkah ka laksawng cu ka rak i put lai.( BIATHLAM 22: 12). Asinain, cu ni le cu caan cu zeitik ah dah a si lai, ti kha ahohmanh nih an hngal lo, Fapa zong nih a hngal hlei lo, Pa lawnglawng nih a hngalh( MATHAI 24:36). Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai.( (MATHAI 24:44).

Kan Bawipa Jesuh nih ka ra zau lai tiah a kan ti. Ka ra zau lai ti a sullam cu tuan ah ka ra lai, a rau ti lai lo tinak a si. Cun mi kip an rianttuanning cio ah pek awkah ka laksawng cu ka rak i put lai a ti fawn. Mi kip an rianttuanning cio ah pek awkah kan laksawng ka ra i put lai ti a sullam cu Kut lawng le tak lawngin ka ra lai lo, nan ttuan man pek awkah thil ka rak i ken lai tinak a si. Kan Bawipa Jesuh cu a bia bantukin a ra zau ding a si caah timh cia in kan um a herh ngaingai.

Zeitindah timh cia cun kan um lai? Pathian he i hawikomh in kan nung zungzal lai( GENESIS 6:10). A zungzal in kan i lawm lai, a zungzal in thla kan cam lai i Pathian kan thangtthat lai.( 1THESALON 5: 16- 17) Hlawknak le miaknak, thluachuah van luh hmuh le tinco caan lawngah i lawmh le thlacam le Pathian thangtthat le Bible rel khi a si lai lo. Sunghzathlaknak ton caan le ngaihchiatnak ton caan le ttahnak mitthli ton caan zongah Bawipa remruat a si ko tiin Pathian thangtthat, Bibble rel, i lawmh i thlacam zungzal khawh khi timh cia tein um cu a si ko.( DANIEL 6: 10).( LAMKALTU 16: 23-25).

Paul nih,” Zeithil nan tuah paoh, minung caah si loin Bawipa caah ka ttuan ti lungput ngei in, nan lungthin dihlak in ttuan u.Bawipa nih nan tuan man an pek hna lai kha philh hlah u, a mi ca i a chiahmi laksawng kha an pek hna lai. A rian nan ttuanmi Bawi taktak cu Khrih kha a si,” a ti .( KOLOSE 3: 23-24). ( EFESA 6: 7-8) Zumtu cu ttuan man laksawng pek ding kan si caah kan ttuan mi rian paoh Bawipa caah a si ti lungput ngei hna usih law lungthin dihlak in ttuan cio ko hna usih. Kan Bawipa Jesuh bia bantukin ttuan man laksawng pek kan si hrimhrim ko lai. Pek tuan le pek tlai lawng a si ko. Bawipa bia cu a tling zungzal, a kan deuh hrimhrim lai lo.

Amahbelte kan Bawi Jesuh nih, ” cu ni le cu caan cu zeitik ah dah si lai,ti kha ahohmanh nih an hngal lo, Fapa zong nih a hngal lo, Pa lawng nih a hngalh. Cu ruang ah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai,”a kan ti caah timh cia le ralring tein Kan Bawipa Jesuh rat lainak cu hngak zungzal ko hna usih. Timh cia le ralring tein a ummi hna lawng nih ttuan man laksawng cu Kan Bawi Jesuh Khrih sinin hmuh a si te lai. Careltu nan dihlak cungah kaa lawm. By David Thangen

error: Content is protected !!