CHIN NATIONAL DAY KA CHUAH LONAK ZONG HI KUM 7 HRAWNG A SI CANG - TIMES OF CHIN NEWS

CHIN NATIONAL DAY KA CHUAH LONAK ZONG HI KUM 7 HRAWNG A SI CANG

Chin National Day hi “Fake National Day” a si timi hi carel ka von thiam hnu in miphun tuanbia kong ka von hlat ve tikah ka pemh i, CND tuah hi thazaang ka pe lo ngai. CND celebration ah ka chuah lonak zong hi Kum 7 hrawng a si cang. Asinain CND hi, aa thawknak biapi chia lem loin, National Day timi biafang te ruang ah Chin miphun nih kan uar tuk i, Nationalism crusade caah a ttha ve sawh ko, ti lawng in ka ruah khawhmi a si.

Tulio Generation Z pawl nih dothlennak an tuahmi, Chin pasal ttha hna, CDF nih teinak an hmuh tikah, the Chin National Day/ National Day, a tak cu an kan lawmpi kho te lai tiah hngahhlang ngai in ka um. Federal State ihruainak, Chinland Constitution an nunter Ni kha, National Day Ni tak cu a si te hnga. Tulio Chin National Day kan ti lengmangmi hi 1948 lio Falam Conference kha an charmi a si i,

1948 lio Falam conference kha, Burma independent latu, U Nu nih caan karlak uktu ah a thimmi hna hruainak in tuahmi a si pinah, Union of Myanmar hruainak phunghrampi, U Nu chuahpimi 1947 Constitution nunternak referendum a si. Fiang deuh in chim ahcun, 1947 Constitution chung i an ttialmi Chin Special Division Act an nunter Ni a si. Cucaah, Union of Myanmar ah dotla tein kan lut timi fehternak Ni, tulio a kan hremtu, Kawl uknak sal ah kan pem Ni a rak si tiah tuanbia a hlathlai deuhmi nih an chim zungzal hi a si.

Union of Myanmar tiah ramkomh dirh hnu, 1948 in 2021 karlak ahhin phunghrampi 3 kan ngei. Pakhatnak. 1947 Phunghrampi (U Nu- Parliamentary chan). Pahnihnak. 1974 Phunghrampi ( Ne Win- Socialist than) Pathumnak. 2008 phunghrampi ( Than Shwe- cang-ai Democracy). Tulio Generation Z pawl dothlennak ah teinak an kan hmuhpi ahcun, phunghrampi thar, 4nk a chuak te lai i, mah tik ahhin a dikmi Chin National Day tuah khawhnak, phunghrampi an kan serpiak kho te lai tiah keicu ruahchanhnak nganpi ka ngei ko.

Note: National cu, Nation in a rami a si i, Chin Nation/ Chin Miphun cu 1889 hlan, Mirang empire nih an kan Uk hlanpi in, Miphun tling kan si diam cang ko caah, CND hi Miphun tling sinak Day zong ah ruah sual lo ding a si hnga, Cun, Tulio kan doh cuahmahmi ral zong hi 1947-48 lio i kan Pale nih an rak kan luhpinak, Kawl uknak dum chung in chuah thannak a si ti zong ifiang a herh. Tuanbia hi pehton ahcun, thate in a lang ko. Thought of night! Catialtu Zasang Cinzah.

error: Content is protected !!