ALP PHU HNIH AH AN I THEN RUANG MANG CANG - TIMES OF CHIN NEWS

ALP PHU HNIH AH AN I THEN RUANG MANG CANG

Rakhine miphun hriamtlaibu pakhat a simi Arakan Libration Party (ALP) cu ralhrang nih nawlngeihnak an lak hnuah hruaitu hna an lung aa khat kho lo i bu hnih ah an i cheu tiah theih a si. Party hotu Khaing Soe Naing Aung hruaimi le Khaing Yee Khaing le Daw Saw Mya Za Linn hruaimi tiin an cheu. An i cheu hlan party seal cu an hman i cathanh zong an chuah colh veve. Jan 6 ah ALP nih cathanh an chuahmi ah ALP Chariman ah Khaing Yee Khaing, Vice Chairman ah Daw Saw Mya Za Linn an si.

Rakhine miphun hna hmailei kong le tinhmi cu atu i kan dirhmun in phak khawh a si lai lo caah dohthlennak a tuahmi bu hna le ramkhel party hna he i bawm in kahdohnak ah kan i tel ve lai tiah an langhter. Jan 12 ah ALP nih cathanh dang an chuah ṭhan i ALP Chairman ah Khaing Soe Naing Aung le Vice Chairman ah Bohmuci Khaing Ma Yuh le Bohmuci Haing Tun Win an si.

Jan 6 i Khaing Yee Khaing te nih an chuahmi cathanh cu ALP hruaitu cheukhat nih party zulhphung buar in phungninglo in an thanhmi a si caah party ṭhencheunak a chuah nakhnga lo ramkhel ceihkhangtu kawmiṭi kan sernak a si tiah an langhter ve.Khaing Soe Naing Aung hruaitu lei in chimnak nawlngeitu Bohmuci Khaing Kyaw Hlaing nih “Sittwe khuapi ah Dec 10-14, 2021 tiang meeting kan ngei. Cu meeting ah cun policy pahnih a chuak.

Chairman Khaing Yee Khaing hruaimi bu nih NCA in kan chuak lai i hriamtlaih in kahdohnak kan tuah lai tiah fek tein an chim. Khatlei nih NCA cu hriamtlaibu dang zong nih an chuahtak lo i kanmah zong chuah awk a si lo tiah an chim ve. Cuticun fak ngai in kan i el hna i biakhiahnak tuah loin meeting cu kan donghter” tiah a chim. Khaing Yee Khaing hruaimi lei in chimnak nawlngeitu Khiang Kyaw Khaing nih “Kawmiṭi kan sermi ah hmunhma an co lo caah atu bantukin cathanh an chuahmi a si.

Bu hnih ah kan i cheunak cu NCA ningin kal an duh, hriamtlaih in kahdohnak tuah an duh lo. Khatlei ah ramkhel ceihkhangtu kawmiṭi thar ser in kahdohnak ah i tel dingin biakhiahnak kan tuah. Atu hi CEC meeting kan tuah cuahmah. Zulhphung buar in cathanh tiang an chuahmi kongah a herh ningin dantatnak kan tuah lai” tiah a chim.ALP ralkap hlun a simi Khaing Linn Aung nih cun “Party chungah ṭuanvo laknak um loin hruaitu anmah le anmah an i ngiarnak a sau cang, atu lawngah a tak in a hung lang.

Bu i cheu i i zuamcawh hi party tuanbia caah a ṭha lo, dohthlennak ca zongah a ṭha lo ti hi ka hmuhning a si” tiah a chim. ALP cu Rakhine ramkulh Sittwe khuapi ah cozah he ramkulh level in kahdohnak min an rak thut i kum 2015 ah rampi huap kahdohnak hnatlaknak (Nation wide Ceasefire Agreement- NCA) ah min an rak thut ṭhan. Credit: The Chin Post.

error: Content is protected !!