PDF (Kalay) Shan Thar Timi Pa Nih A Hruaimi Sakhaan An Lakpiak Hna - TIMES OF CHIN NEWS

PDF (Kalay) Shan Thar Timi Pa Nih A Hruaimi Sakhaan An Lakpiak Hna

Kalay pengkulh chaklei ah a ummi #Tinthar khuakomh, #Do-ngwe khuakomh, #Ing-kyung, #Kyuat-pioh khuakomh le #Kohku khuakomh hna ah mizapi namneh in a harnak a petu, Shan Thar timi pa nih a hruaimi hriamtlai bu cu 26 September 2021 ah PDF (Kalay) nih an kah hna i sakhaan an lakpiak hna tiah thawng kan theih.

Shan Thar nih a hruai mi phu hna hi meithal an i ken i a cunglei khuakomh ah a ummi khuami hna ningcang lo in ngunkhuai an khawlh hna, an thilri an chut hna, nu cheukhat an tlaihhrem hna pin ah an duh lomi minung cu dalan asiloah rithaisii ningcang lo in nan tuah tiin an ti hna thahnak an tuah tiah PDF (Kalay) nih thawng fianternak an tialmi an telh.

No photo description available.

“Shar Thar timi pa nih a hruaimi hna nih khuachung ah an duh paoh in meithal he mipi an namneh hna. An thah hna i tangka an hal hna. Sui le ngun an chuh hna pin ah nu cheukhat an tlaihhrem hna. Hi kong hi khuami nih PDF (Kalay) sin ah thawng an kan thanh. Cu kong cu PDF nih hlathlainak kan tuah hnu ah, PDF ralkap Special Force phu nih a kaakip in an sakhaan cu kan kulh kan luh hnawh hna.

Shan Thar hruai mi zong nih meithal in an kan kah ve caah Shan Thar cu meithal kahnak in a thi. Cheukhat kan tlaih hna i kan thlah rih hna lo,” tiah PDF Kalay nih thawng an thanh. Shan Thar phu nih an ngeihmi hriam pawl kan lak pin ah mipi sin ah an lak mi tangka, sui le thilri le motorbike zong kan lak i khuakomh pawl he committee dirh in a ngeitu mipi sin ah phanhter kan i zuam lai tiah PDF (Kalay) nih an thanh chap.

May be an image of motorcycle, outdoors and text that says 'REDMI NOTE 9'

“PDF (Kalay) cu NUG hruainak tang ah a ummi le ral lei kong ah NUG nih zulhphung a sermi kan zulh. Mipi humhimnak le an ngeihchiat chawva dihlak kilkampiak hi kan rian a si. Hi bantuk in dohnak kan tuah lio ah mipi ningcang lo in a tuahto tu phu le rian a tuantu phu cu ralhrang (Kawl ralkap) doh bantuk in kan doh ve hna lai,” tiah Kalay (PDF) nih thawng an thanh. Source: PDF (Kalay) Statement – 29 September 2021. Credit: The Chinland Post

error: Content is protected !!