Lungler Sakhan Kahnak Thawngpang Thar - TIMES OF CHIN NEWS

Lungler Sakhan Kahnak Thawngpang Thar

Lungler sakhan kah ruang ah a zaam mi hna Mizoram Cherhlun le Ngharchhip khua nih tlangrian in an va don hna
========
2021 September 10 Thantlang Peng, Zahnak tlang Lungler sakhan kah ruang ah khua chuah takin himnak lei ah a zaam mi hna cu Mizoram, Cherhlun le Ngharchhip khuami hna nih nihin September 11 ah tlangrian in an va don hna tiah thawng kan theih. Atu an va don mi hna hi a tam deuh cu Lungler khuami le pawngkam khuami hna an si.

Hi kong he pehtlain Thingsai khuasa T Zosangpui nih, “Lungler sakhan kah ruang ah a zaam mi hna hi Cherhlun le Ngharchhip khua mi hna nih tlangrian hrihhawh in an va don hna. Khuachung i motor a um mi poh kal in an umnak hmun tiang an va don hna,” tiah a chim. Hi ralzaam hna ca ah zeitindah khuami nih an tawlrel lai i an zohkhenh hna lai ti thawngfiang a um rih lo.

Lungler sakhan kahnak ah CNA/CDF lei in a thimi an um lo nain minung 7 hliam an tuar i SAC mithat phu lei zong tam ngai an thi tiah kan theih. Myanmar ram uknak hramhram in Min Aung Hlaing nih a laak hnu Mizoram ah a zaam mi hi nihin tiang minung 1000 fai an si cang. Hi chung ah CM hlun Salai Lian Luai telh in MP minung 20 leeng an si cang tiah kan theih. Crd : The Hakha Post

Relchih >>> A Herh Taktakmi Cu Pakhat Lawng A Si Ko
××××××××××××××××××××××××××××××××××××
Jesuh nih, “A herh taktakmi cu pakhat lawng a si ko, Mary nih ahmaanmi thil cu aa thim cang i cucu ahohmanh nih an chut lai lo,” tiah a ti.( LUKA 10:42) . Jesuh le a zultu hna cu Martha inn ah an tlung. Martha nih nau pakhat a ngeih i a min Mary a si. Mary cu Bawipa Jesuh ke hram ah a tthu i a cawnpiaknak kha a ngai. Martha bel a rian a tam caah a ing a puang. Marthar le Mary nih buaipi mi pakhat veve an ngei.

Martha nih ing puang ngai in a rian a buaipi lio ah Mary cu Bawipa ke hram te ah tthu in a cawnpiaknak kha lunglawm thanuam ngai in a ngai. Zumtu nang le kei teh Martha dirhmun ah maw kan um, Mary dirhmun ah dah kan um? kan nun i chek tuah hna usih. Mah rian lawng a buaipi mi maw kan si, Bawipa cawnpiaknak a ngai i a zul i a tuahmi dah kan si. ” Cathiang nih minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai,’ tiah a ti ( MATHAI 4:4).( DEUTERONOMI 8:3).

( LUKA 4:4). Mitampi cu eidin kong lawngah kan buai i nifatein eidin tirawl caah manh caan ngei loin rian kan ttuan hna. Martha he kan i dannak a um lo. Martha bantukin mah rian lawngah kan buai i Bible rel caan, thlacam caan le Pathian he i hawikomhnak caan kan ngei kho ti lo. A ngai ngai tiah cun Cathiang nih minung nunnak hi rawl lawngin a si lo, Bawipa kaa in a chuakmi thil kip in a nung a ti. Pathian nih cun a kan deuh hrimhrim lai lo.

Cucaah Martha bantukin mah rian lawng a buaipi peng mi si loin Mary bantukin Bawipa bia a ngaimi si hna usih law nifatinte Bible relnak le thlacamnak in Pathian he nun aa pehmi si zungzal ko hna usih. A herh taktakmi cu pakhat lawng a si ko, Mary nih ahmaanmi thil cu aa thim cang i ahohmanh nih an chut lai lo a ti. A herh taktakmi le ahmaanmi thil cu pakhat lawng a si i cucu Bawipa he nun i peh i thei ttha tampi tlai hi a si ko. Keimah ah hin i peh u law kei zong nanmah he kaa peh ve lai.( JOHAN 15: 4). Careltu nan dihlak cungah kaa lawm. By David Thangen

error: Content is protected !!