Hlasakthiam Sui Hlawn Rem Nih CDF Pawl Caah Biacahnak A Tuah - TIMES OF CHIN NEWS

Hlasakthiam Sui Hlawn Rem Nih CDF Pawl Caah Biacahnak A Tuah

CDF caah thawng thanh ! Ral nan doh pah i nan bat tuk tik ah kan inn ah rak i din ko uh- Kan inn cu CDF caah on cia (peng) a si. Nan paw a tam ah cun kan sin ah rak ei ko uh, kan chuan mi ti le rawl cu nan ca zong ah a tel chih. Hma nan pu sual maw? Kan inn ah rak lut ko, a um mi si le ai in kan nin thlop ko hna lai.

Na thazang a der (dih) sual zong ah innchung ah rak i din ta ko, kan ngeihchunh eidin thazang thawn nak te pek in ih nak te zong kan nin ser piak ko lai. Ralhrang pawl he hmaitonh in nan ni ton lai ah chi 1 te hrial ta nan duh hna zong ah kan innchung te ah rak lut ko uh, nan him nak ding cu kanmah rian ah ka ni ruah ko. Kan dihlak in hriamtlai he tlai lo he kan si khawh tawk cio in kan ram damnak caah tuanvo kan ngei cio. Kan tei hrim hrim lai. #crd. Sui Hlawn Rem

Relchih >>>> A Herh Taktakmi Cu Pakhat Lawng A Si Ko
××××××××××××××××××××××××××××××××××××
Jesuh nih, “A herh taktakmi cu pakhat lawng a si ko, Mary nih ahmaanmi thil cu aa thim cang i cucu ahohmanh nih an chut lai lo,” tiah a ti.( LUKA 10:42) . Jesuh le a zultu hna cu Martha inn ah an tlung. Martha nih nau pakhat a ngeih i a min Mary a si. Mary cu Bawipa Jesuh ke hram ah a tthu i a cawnpiaknak kha a ngai. Martha bel a rian a tam caah a ing a puang. Marthar le Mary nih buaipi mi pakhat veve an ngei.

Martha nih ing puang ngai in a rian a buaipi lio ah Mary cu Bawipa ke hram te ah tthu in a cawnpiaknak kha lunglawm thanuam ngai in a ngai. Zumtu nang le kei teh Martha dirhmun ah maw kan um, Mary dirhmun ah dah kan um? kan nun i chek tuah hna usih. Mah rian lawng a buaipi mi maw kan si, Bawipa cawnpiaknak a ngai i a zul i a tuahmi dah kan si. ” Cathiang nih minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai,’ tiah a ti ( MATHAI 4:4).( DEUTERONOMI 8:3).

( LUKA 4:4). Mitampi cu eidin kong lawngah kan buai i nifatein eidin tirawl caah manh caan ngei loin rian kan ttuan hna. Martha he kan i dannak a um lo. Martha bantukin mah rian lawngah kan buai i Bible rel caan, thlacam caan le Pathian he i hawikomhnak caan kan ngei kho ti lo. A ngai ngai tiah cun Cathiang nih minung nunnak hi rawl lawngin a si lo, Bawipa kaa in a chuakmi thil kip in a nung a ti. Pathian nih cun a kan deuh hrimhrim lai lo.

Cucaah Martha bantukin mah rian lawng a buaipi peng mi si loin Mary bantukin Bawipa bia a ngaimi si hna usih law nifatinte Bible relnak le thlacamnak in Pathian he nun aa pehmi si zungzal ko hna usih. A herh taktakmi cu pakhat lawng a si ko, Mary nih ahmaanmi thil cu aa thim cang i ahohmanh nih an chut lai lo a ti. A herh taktakmi le ahmaanmi thil cu pakhat lawng a si i cucu Bawipa he nun i peh i thei ttha tampi tlai hi a si ko. Keimah ah hin i peh u law kei zong nanmah he kaa peh ve lai.( JOHAN 15: 4). Careltu nan dihlak cungah kaa lawm. By David Thangen

error: Content is protected !!