Ralrin Ding! Hakha police station hmai ah uihrut pawl motor he an i khawm cuahmah - TIMES OF CHIN NEWS

Ralrin Ding! Hakha police station hmai ah uihrut pawl motor he an i khawm cuahmah

kawl ralkap le palek pawl cu an lau thluamah cang. Nizan ah Chin ram khuapi Hakha ah Uknak firtu kawl ralkap pawl cu CDF Hakha nih an kah hna i minung 4 an thi. A dang hliamhma a tuar mi zong 8 leng an si tiah theih a si. A tu zong hi Hakha um uihrut pawl cu hmunkhat ah an i khawm cuamah tiah theih a si. Cu caah Mipi zong ralrin tak tak in um a hau.

Hakha police station hmai ah uihrut pawl motor he an i khawm cuahmah (1:00 pm). Cucaah kan umnak cio in ralrinnak te le mitfim, hnafim tein rak um cio hna u si! *Lau ding a si lo, i ralring cio ding tu a si lai. Hakha Campaign For Justice

Relchap >>>> Vawlei cung ram 195 tluk a um mi ah Kawlram(Myanmar) tluk uknak chia hi an um ve hnga maw, an um zongah an tlawm lai mu ti hi ka hei ruat tawn. Caan tampi ah khua sual ka ruah ah hin, Kawlram mi ka si hi mi vanchia bik ah kaa ruah ttheu. Kawlram hi hramhram uknak voihnih an rak lak cang ti cu kum 30 hrawnghrang minung nih a tuanbia in kan theihnak lawng a si nain a voithumnak cu kan chan he aa tong. Tuanbia men in kan rak theihmi nawlngeihnak lak hi kan tong rih lai ti hi lungkil thlite zongin ka ruat ti lo. Kan ram a hung i thlen pah cang i Zauk phung ah kan kal cuahmah ko cang ti hi kei zei thei lo pa nih ka hei ruah tawn ko. Nain kan ruahlo piin kan huat bik uknak hramhram uknak lak a si tikah minung 600 tluk nunnak a liam pinah hmailei suttung bang zohthla ding nu ttang cung pommi hna 40 leng thah an si.

Uknak that lo ah a tthangmi hna nih cun kan theih bangin khuate ah ralkap an kal i phorter phorhter kan si. Khuate fa lo riantuan kan si i kan lo riantuannak ah kuli phorh ah auh kan si. Minung an duh zat hmuh khawh lo ah tuk le velh kan tong. Inn lo rian kaltak in kuli phorh si chinchap ah an thilrit kalpi khawh lo ah hnu in chuih chih kan tong. Kan ar hna an kan firpiak kan hmuh ko hmanhah kan holh ngam lo. Kan far le duh poah in an kan tuahtopiak hna. Chimh ding tam tuk liangluang khi um rih.

Cu uknak chia chungin kan luat cang lai kan ti lioah uknak chia nih a kan tlun hnawh than tikah a luancia 1962, 1988 bangin thut sawh awk si ti lo tiin mi tampi lamzawhnak pehzulh in thlathum chung duhlo langhternak tuah a si pinah mi tampi 600 tluk nunnak tiang a liam. Kum 1962, 1988 lioah cun lamzawhmi tlaih le kah a sin ain 2021 cu an inn ciah bak ah kalhnawh in kah le nu ttangcung pommi kah tiangtiang an tuah. Cu nih a langhter mi cu a luancia nakin tutan uknak hi a chiakha deuh ti khi a si ko.

Minung a simi nih thih tih lo le meithal , zen le kuan a tih lo hohmanh kan um lo. Tihmi hnu kirpiak loin dirhnawhtu mino thatha tampi kan hmuh hna tikah upat tlak taktak an si. Meithal, zen le kuan cu mit nih ttih hmanhsehlaw thinlung nunnak nih a ttih ti lo. Hriamnam tha a ngeitu ralkap(ral lo kap) hriamnam tha ngei loin a dohtu vialte upatnak kan pek hna. Nan ralthatnak tuanbia hi chim len dai ti lai lo.

Hmailei zongah hi nakin a zualhma deuh khomi a si caah mnungak, tlangval mino thatha duh zong duhlo zongah, ngamh zong ngamh lo zongah kan dirhmun ruangah meithal he raldoh caan a phan khomi a si. Minung sinak in ngamh a si hrim lai lo, nain chanchung tuanbia pakhat ttialtu nan si lai kha philh sawh hlah uh. Meithal hmaiah hodah kut lawngin a chuahhnawh ngam lai? Nain meithal in thih ttih loin a dirhnawh ngamtu hi miphun dawtnak muru cu a si.

Mino thatha raltuk ah nan i thawh lai i, nu le pa nih thindomh in thla an in campiak hna lai. Na fa ralram ah a thi ti thawng kan theih sual lai ti hi an tih bikmi a si lai. Ka fa te kha a nun bu in kan sinah rak kir than hram seh ti hi nu le pa thlacamnak a si lai. Cheukhat cu thawnchia an dong men ko lai. Nain mu dawtmi mino hna nikhat khat ah kan thi dih te lai i, zawtnak le a dang ruangah thih nakin miphun le ram dawt ruangah nun nan thap hi thih hnu nan min le nan kong chim len a dai hrim lai lo.

Delhi ah Dr Sasa nih a chimhmi cu ka pa AB hi zawtnak ruangah a thi ti cu ka duh bak lo caah ka pa zong tha tein ka chimh. Pu AB lamcawhnak ah, miphun le ram riantuannak ah a thi ti thawng theih lawng ka duh tiah a rak ti bal. Ni khat caan khat ah kan thi dih te lai i thih man a ngeimi mino tha kan si ti philh hrim hlah uh sih.

Gideon nih Median kut in Isreal a luatpi hna lioah Median ralkap a ting leng a simi hriamnam tha a ngeimi Median ralkap kha hriamnam lo minung 300 nih muko, thawllawng le meifar in teinak an hmu. Goliat cu vawlei thuamthil cu i hruk set len in hriamnam tha i put hmanhsehlaw, nautat mi ttu cawnghnak ah caan a hmang i mi nih hmuh lonak hmun, amah te lawnga um lio zong tingtang put tum in Pathian a thangthat mi David nih thilthuam tha le hriamnam ha ngeimi Goliat a thah. Raltuknak caah hriam le nam le thuamthil cu a herh bak mi a si nain teinak petu an silo.

Ting leng kai ralkap pi cu minung 300 te lawng hriamnam loin teinak an hmuh i, thilthuam le hriamtha he a dirmi Goliat a teitu David cu Pathian min hmangin a kal tikah teinak an hmuh. Cucaah David nih mi cheukhat nih raltuknak ah an rangleng le rangtum an i bochan nain kanmah cu kan Pathian lawng kan i bochan a ti bangin, kawl ralkap cu hriamnam bochan in kan doh hna hmanhsehlaw hriamnam nih a tei kho lotu Pathian kan ngei. Dawtmi ka mino hawi hna, hriamnam nan ngeilo zongah kan biakmi Pathian min i put in raltha ngaiin dir ko uh. Gideon le David cu hriamtha in teinak hmuh loin Pathian thawngin teinak an hmuh.

Anmah an Pathian cu kan Pathian a si ve. Gideon nih teinak a hmuhpi cang sin in Isreal nih nangmah thawngin teinak kan hmuh caah Isreal nih nangmah le na techin fapar nih nan kan uk lai an tin ain keimah thawngin teinak kan hmuh hi a si lo, Pathian thawngin a si caah Isreal cu Pathian lawng lawng nih a kan uk lai tiah Gideon nih a ti hna bangin, nikhat caankhat ah teinak kan hmuh tikah keimah thawngin timi phorhlawtnak kan ngei sual nakhnga lo belte i ralrin thiam kan hau lai. Siria raldohnak ah profet Elisha sinum pa nih ka bawipa zeitin kan i tuah lai ralkap an tam tuk tiah a ti i Elisha nih ttih hlah anmah nakin kanmah kan tam deuh, vancung mi nih an kan umpi i anmah nakin kanmah kan tam deuh tiaha ti bangin ralkap tampi an si i mino hna mi tlawmte lawng kan si nan ti men ko lai nain ttih hna hlah uh nan sinah Pathian vancung mi tampi nih an umpi hna kha hngalh camcin ko uh.

Mi tampi ralkap hriamnam ttha le thilthiuam tling ngeimi hna kha mi tlawmte hriamnam ngeilo mi hna nih kan/nan tei hna tikah teinak petu cu Pathian lawng pei a si ti hi fiang tein kan hngalh lawng si loin zum lotu zong nih an hngalh caan a phan vet e lai. Mi tampi mi tlawmte nih tei cu khuaruahhar, a tthawngmi Pathian a sinak lawnghternak hmelchunh cu a si.

Cucaah ka dawtmi mino hawi hna, miphun caah nan mitthli a tla ko lai, nan thlan hripi a luang ko lai, nan thisen a luang ko lai i, nan nunnak zong a liam ko hnga. Nain tu ka tuarnak vialte miphun le ram luatnak a si timi lungput i ngeih cia a hau. Hawidawt cheukhat hna kan tling ti lo kho men, nain teinak thantar kan zar tikah nan pumsa in i tel kho ti hlah hmanh uhlaw miphun le ram caah nusal, pasal mi roling tuanbia tialtu na sinak belte cu a tlau kho ti ve lai lo.

Nan thisen a luan i nan nunnak nan pekmi hi sau a rauh hlanah a par zau ko lai. Nan thisen luan in nunnak pekmi hi kan ram le miphun ceunak a si te lai. Kan umnak hmun in thla za kan cam cio hna lai i nunnak le thisen luan lo tein teinak kan hmuh in teinak thantar kan thlir tti khawh cio naklai a dinglo mi uknak chia hi kan ti khawhnak lam cio in lungrual tein hmainor chin ko hna u sih. Thisen le nunnak cu a man chiah khawh lomi a si bantukin mansung thisen le nunnak pekin a dikmi zauk phung nan cawkmi hi a takin a theipar kan zun te ko lai. Thisen le nunnak pekmi cu parttha in a par zau ko lai. Kan ram le miphun ah “Thisen par” a par zau ko lai.

Mi tampi nunnak le thisen a luang cang i ngaichiatnak tongmi vialte Bawipa nih in hnem hna sehlaw thongtla mi vialte Pathian nih luatnak in pe ko hna seh. Nunnak a liam cang i thisen a luang cangmi hna le hmailei miphun le ram caah sutung bang zohthla mi kan hawidawt hna nunnak le thisen hi a lak si loin nan nunak le nan thisen hi a par te lai i techin fapar hna nih nan tuanbia chimrel an dai ti lai lo. Nunnak liam le thisen luan hau lo tein teinak kan hmuh khawhnak ca tu ah thlacam cio hna u sih.

Note: Hi cabia ka ttial tikah amah hmanh i thawh ngam ttung lo ah tiah a ka timi zong nan um ko lai. Umnak hmun aa dang ruangah duhning in thil aa tuah thiam ve lo hrat cu nan ka soisel zongah kan cohlan ko hna lai.
Salai Za Thawng
Melbourne, Australia

error: Content is protected !!