Japan Mipi Nih Kawlram Kongah Japan Cozah An Nawl Cang Hna - TIMES OF CHIN NEWS

Japan Mipi Nih Kawlram Kongah Japan Cozah An Nawl Cang Hna

People protest a coup d'etat by the Myanmar Armed Forces in front of the Ministry of Foreign Affairs in Chiyoda Ward, Tokyo on April 1, 2021. ( The Yomiuri Shimbun via AP Images )

Ralhrangbu nunkhua sau nak dingah chawva bawmhnak vialte chah piak dingin Japan Mipi nih Japan Cozah Agency- 7 le Company 12 an nawl hna. A tu ahcun Kawlram Mipi thimi Cozah nawlngeihnak chut in ralhrangbu nih a uknak ni 100 deng, thla 3 leng a si cang. Mah chungah ralhrangbu nih sual ngei lo mipi a that mi minung 750 leng an si, mi tampi hriamhma an pu, mi tampi 3000 leng thong an thlak.

Mah lawng a si lo. Tlangcung mi sinah ralhrang cawlcanghnak ruangah Mipi tampi Ralzam Thong 10 leng cu an umnak khua, ram chuahtak in an vak vai.Thil sining vialte zoh in Japan mipi hna nih April ni 13-19 chungah Japan ram ah a um mi Cozah Agency 7 le Company 12 cu ralhrangbu a nunkhua a sau ter kho ding mi zeibantuk chawva tanpi nak vialte chah dih dingin an nawl hna.

Japan mipi nih an ti mi cu “Democracy le zalawnnak duh le hmailei caah ruat buin a cawlcang lio mi Kawlram Mipi Au thawng hi Japan nih a theih ko ti langhternak caah ralhrangbu pawl chawva luh nak ti hna pawl duhsah in chah piak hi Japan ram nih a tuah khawh mi hna lakah pakhat a si ve” tiah an ti.

Amah belte cu Japan mipi nawl nak hi Japan cozah agency le company pawl nih an pom le pom lo belte cu fiangfai in theih a si rih lo. Mah Company le Agency pawl nih ralhrangbu nih hramhram in uknak a lak mi cungah kan lung retheih ngai, fakpi in sual phawt nak zong an langhter nain, ralhrangbu caah a thahnem tuk mi Project hna cungah tuanvo lak ding belte ahcun aw-ang an chuah bak rih lo.

Japan cozah nih kum 2011 thawkin kawlram thlennak le pumpak chawhlehnak hna telin development caah Japan Yen 1 trilion cu kum fatin a pek pin ah technology le tuanti nak caah Yen 400 Billion zong a pek. Hi bantukin a si caah Japan mipi nih Japan cozah agency 7 le company 12 sin ah “ralhrangbu nan pek tawn mi chawva bawmhnak vialte chah ding, ralhrangbu sinah pek tawn mi thanchonak he pehtlaihmi bawmhnak vialte chah le chawlehnak ah ralhrangbu he pehtlaihnak ngei lo ding in” an nawl hna hi a si.

Cu lawng si loin Japan mipi, public le private chawlehnak pawl cu Kawlram mipi he hmunkhat ah kan dirh tti ko ti fiangte in langhter dingah kan nawl hna lai tiah Japan mipi aiawh in Japan cozah agency le company pawl a tong mi pakhat nih a chim. Credit: The Chin Post

error: Content is protected !!