Mizoram Khuate Ah Krihfabu hruaitu hna le palek hna kar ah buainak a chuak - TIMES OF CHIN NEWS

Mizoram Khuate Ah Krihfabu hruaitu hna le palek hna kar ah buainak a chuak

Mizoram Sailutar Khua Palek Ah Nih Thlacam A Pum Mi Hna Cu Tin Dingin An Ti Hna Caah Buainak A Chuak. Sailutar khua ah James Lalramliana Crusade thawng in nizan April ni 21 zaan suimilam pa 7 hrawngah Krihfabu chung harnak a tlung i hngakchia rual 30 hrawng thlacam le hlasa lio mi hna cu Palek nih tin dingin an ti caah Krihfabu hruaitu hna le palek hna kar ah buainak a chuak.

Sailutar krihfabu ah James Lalramliana crusade hi tukum kum hramthawk January ni 10 in tuahmi a si. COVID-19 kong cozah nawl chuak bantukin Darlawn Palek OC le Sakawrdai SDPO nih hngakchia pawl thlacam pumhnak le hla an sak mi hna cu tin dingin le Biakinn cu khar rih dingin palek nih an ti hna. Krihfabu hruaitu hna nih krihfabu chungah harnak a tlun lio a si caah Biakinn cu kan khar kho lai lo an ti caah Palek le Krihfabu kar ah buainak a chuak mi hi a si.

Hi kong he pehtlaih in thawngtha chim tu James Lalramliana le Krihfabu hruaitu pa 8 hna cu COVID-19 he pehtlaihin Cozah nih nawl a chuah bantuk in tlaih ding an ti nain, Krihfabu hruaitu le Palek pawl cu saunawn te an i chawnh hnu ah zan 11:30 hrawngah an i rem kho tiah theih a si.

Mizoram ah Covid-19 hrit a karh ngai caah Cozah nih April ni 20 in 26 tiang lockdown thanh a si i, Cozah bia chuak ahcun lengchuak, mipi pumh tonnak tuah cu khap a si pinah Biakinn le Sianginn zong khar a si. Credit: The Chin Post

error: Content is protected !!