Kah lo awk thatlo caan zong a phan te kho men - TIMES OF CHIN NEWS

Kah lo awk thatlo caan zong a phan te kho men

“Chunmang le Saduhthah” April 13, 2021
Biaceihtu 8:22 “Gideon cu nangmah nih kan uk tuah, Midian kut chung in na kan chuah, an ti. Gideon nih, “Keimah nih kan uk hna lai lo, Bawipa nih an uk hna lai, a ti hna”

1. Israel mi nih Bawipa duh lomi an tuah caah Bawipa nih Midian ralhrang kut chungah kum 7 a pek hna. Kawlram mipi nih Bawipa Pathian an cohlang loh, Bawipa duh lomi milem an biak, missionary an thawl hna ruang ah kum 70 Ralkap ralhrang misual kut ah a kan pek ve.

2. Kawl biaknak nih hin thilnung thah an duh lo. Khiangthawng chung fikfa te hmanh that loin an chuahter tawn. Fikfa hmanh thah lo ding, a timi biaknak le miphun nih nunnak le thlarau ngei, sualnak ngei lo, mino tete 700 tluk an thah cang hna. A thongthong in an tlaih fawn hna. 3. Bawipa mithmuh cu chim lo, Buddha an pathian mit hmuh zongah sual nganpi an tuah cang, an tuah lio, an tuah ko rih lai. Teitu an lo nain a sungmi an si. An tuhmi an zun cawk te lai lo. Anmah tu biaceih zung ah chuahpi an si ve te lai.

4. Gideon le a ralkap nih Muko an tum tikah Bawipa nih ral vialte cu anmah le anmah kha a tukter ciammam hna i Beth-shittah tiang an zam. Bawipa tuah mi a si. 5. Kawlralkap nih an thah, an tlaih mi hna lak ah hin ralbawi le ralkap chungkhat le hawikawm tampi an i-tel ve lai. Caan a zat tikah anmah chungah tuknak, tlaihnak le thahnak a chuak tuan ve lai.

6. Tu lio caan ah CDM ah a lutmi hna hi nan sunghmi nan hlawh nan hmuh than dih te lai. Ram caah minthatnak an in pek rih hna lai. Har ko hmanh seh, van i hnek ko rih u. 7. CNA nih kap rih lo tein lungsau an i-cuhmi cungah kaa lawm. Tarnu tarpa le ngakchia harnak chung in, har chin nak chung in an khamh hna a si. Kah lo awk thatlo caan zong a phan te kho men.

8. Khuachung nungak tlangval hna caah CNA ah luh ve caan rem ngai a si. Khua chung i um sawhsawh nak cun, training kai ve le thiam ve hi a tha deuh tuk. Cozah thar aa thlen tikah cozah riantuan, Federal Army, nan si colh te lai. Cozah thar nih ralkap a lutmi cu covo tam khun in a pek te hna lai. 9. Federal Cozah thar a chuah tikah, “Chin mi hi Kawl ralkap mi tha lo kut in a kan chuahtu nan si, nanmah nih kan uk tuah u” an ti te lai. Gideon bantuk in, “Chin mi nih kan in uk hna lai lo, Bawipa tu nih kan uk ko seh” kan ti ve te hna lai.

10. Cozah uknak thar ah Thawngtha biatak zalong tein chim khawh asi cang lai. Darius siangpahrang nih “Ka peng chungmi dihlak nih Daniel i a Pathian cu nan tihzah lai i nan upat lai” a ti bantuk in Kawlmi vialte nih Chin mi nih an biakmi Pathian hi Pathian taktak a si ti an hngalh cang lai.
Credit: Sailo Pa

error: Content is protected !!