CDM Ah I Tel Dingin Cozah Thar (NUG) Nih Ralbawi Hna Sinah Sawmnak A Tuah - TIMES OF CHIN NEWS

CDM Ah I Tel Dingin Cozah Thar (NUG) Nih Ralbawi Hna Sinah Sawmnak A Tuah

Nawlngeihnak a latu State Administrative Council (SAC) chairman Ralbawizik Min Aung Hlaing nih nawlngeihnak a lak i mipi cungah a tuahmi kongah a lungtling lomi ralbawi an tam pi. Cu hna pawl cu CDM ah i tel in mipi cozah sinah i fonh zokzok dingin Caankalrak Cozah (NUG) nih sawmnak bia an chim.

NUG i Federal Union Affairs vuanci a simi Dr. Lian Hmung Sakhong nih kahdaihnak kongah aa tong i ngamhtlak deuh a hawile ralbawi hna sinah atu bantukin sawmnak a tuahmi hi a si. A luanciami kum 5 i remdaihnak kong ceikhannak ah bia aa ruah tawnmi ralbawi ngan hna cu nawlngeihnak lakmi kongah a lungtling lomi an si, cu hna cu a rannak in mipi cozah he i fonh dingah Dr. Lian Hmung Sakhong nih sawmnak bia a chimmi a si.

“Keimah he aa naihniammi hawikom hna sinin ka theihmi cu ralbawi tampi nih Min Aung Hlaing thil tuahmi hi an lungtling lo ti hi a si” tiah a chim. Dr. Lian Hmung Sakhong cu NCA kongkau ah tuanvo ngeitu bik pakhat a si ve. CNF ah Vice Chairman a si. Cun UPDJC (Union Peace Dialogue Joint Committee) ah Vice Chairman a si fawn. NCA minthutnak kongkau ah ralbawi tampi he aa tongmi le aa theithiammi a si. Atu cu April 16 ah sermi National Unity Government ah Minister of Federal Union Affairs rian pek a si.

“Ralbawi hna, hotu ngan hna, mipi lei ah dir in CDM tuah ve u. Min Aung Hlaing hnuzul si hlah u. Dinnak tu zul deuh u. A dik a hmaanmi tu zul u. Minung lungput ngei in minung hawi pakhat le pakhat i pehtlaih khawhnak mibu sernak ah i tel cio u” tiah Dr. Lian Hmung Sakhong nih cun a chim. Source: Myanmar Now
Credit: Chin Post

error: Content is protected !!