US Raltuknak tilawng, “destroyer USS John S. McCain”hna cu China khuataw ah a von dirter cang - TIMES OF CHIN NEWS

US Raltuknak tilawng, “destroyer USS John S. McCain”hna cu China khuataw ah a von dirter cang

Bidden Presidency cu ni 40 a von kal cang i, mah chung foreign policy a kalpi ning cu a step a hman ngai tiah ka hmuh.
Trump chan ahcun US lawng in zei paoh kan tuah khawh tiah US nih hawikom ram vialte hnu a chit dih hna. Asinain Bidden nihcun a von pehtlaih tthan dih hna. “ Kanmah lawng in kan ttuan lai lo. Kan hawile he kan ttuan lai” tiah a ti i, hawikom thate in aa sawm.

US hruainak in Canada le Europe ram tampi cu, ifonh in, “The North Atlantic Treaty Organization” (NATO)” tiah Soviet Union/ Russia dohtu buu cu, 1949 ah a rak dirh. NATO thawng in, Soviet Union cu a rak cawl kho lo. Nihin ahcun a tlu cang. Soviet Union/ Russia a tluk hnu in China 🇨🇳 an von kai tthan.

Feb 18 , 2021 ahkhan, “Quadrilateral Security Dialogue” tiah USA nih India, Australia, Le Japan cu informal in meeting a thutpi hna. A tawinak in “Quad” meeting an ti i, media cheu khat nihcun, Asian NATO/ Indo- pacific NATO tbk zong in an ttial cio cang. 2021 ahcun, China hi US caah a ral ngan bik a si cang. Cucaah, China khamnak caah, Asian NATO hi biatak tein Bidden nih thazaang a von lakpi cang hna tiah an ruat cio. US Raltuknak tilawng, “destroyer USS John S. McCain”hna cu China khuataw ah a von dirter cang.

Cun, Joe Bidden nih Kawlram kong a von kalpi ning zong hi, tu tiang ahcun lung a tling ngai. Diplomat in a hram a von dawmh viar cang. Kawlram kong issue cu, US senate in a kalpi. A hlawh a tling ngai. G7 in a kalpi rih. An dirhkamh. G7 hmang in, ASEAN countries pawl pressure a von pek cuahmah fawn hna. Asian NATO in thazanga von lak rih. Trump nih a chuah takmi, UN human rights council ah chungtel a von lak tthan i, UNHRC zong in hma a lak cang.

UN Security Council ah March thla hi President an tuan lai i, fakpi in Kawlram kong a hram an sih chap lai tiah zumhnak a um. Cucaah, Joe Bidden nih ni 40 chung President a von ttuanmi ah a hmalak ning zoh tikah, a tuah duhmi thate in a hlawhtling ko lai tiah hnabeiseinak ka ngei. Nihin tiang an kal ning ah an lam a tluang ngai in a lang. Kawlram kong zong hi thachiat ding a si rih lo. Zeicatiah, a hram an dawmh lio lawng a si rih. By Zasang Cinzah

error: Content is protected !!