Na min, na umnak le na ph number tu kuat kan philh hlah mu - TIMES OF CHIN NEWS

Na min, na umnak le na ph number tu kuat kan philh hlah mu

Hello, ram chung a ummi nu le pa, u le nau vialte hna. Kawlram chung wifi phih an timh cang ti kan theih tikah kan lung a ttha lo. Bawipa nih in um pi zungzal ko hna seh🙏 Wifi phih hnuah zeidah a cang lai ti kan thei lo. Thil poipang na ton sual i zapi sinah thanh na duhmi a um ahcun a tanglei hmanthlak chung i phone number silo le Mail ah thawngpang kuat le chim khawh a si.

A herh a si ahcun kanmah lei zongin chawn le petlaih khawh kan rak i zuam lai. Na min, na umnak le na ph number tu kuat kan philh hlah mu. A langtlang in nan caah fate bawmh kho tu tel kan si hnga maw tiah ruahnak he hi ca hi kan rak tialmi a si. Miphun unau hawi , Credit: CMpage

No photo description available.

Relchap >>>> 𝐅𝐞𝐝𝐞𝐫𝐚𝐥 𝐫𝐚𝐦 𝐬𝐞𝐫𝐧𝐚𝐤 𝐝𝐢𝐧𝐠 𝐥𝐚𝐦𝐭𝐡𝐚𝐫 𝐤𝐚𝐰𝐥 𝐚 𝐡𝐚𝐮
Chin miphun nih kan i tinhmi ramkhel kawltung (political goal) kan ni fiang. Cu kan kawltung cu federal democracy ram ser le mah tein khuakhan lairelnak nawl (right to self-determination) lak tthan kha an si ko. Mah tein khuakhan lairel nak nawl kan ti tikah “internal self-determination” timi ramkhel (politics), sipuazi (economics), luhmuzi (social), le nunphun (culture) kongkau ah leng lei hnahnawh nak (outside interference) um loin mah duh ning tein khuakhan lairel nak nawl kha kan chim duhmi asi.

“External self-determination” timi ram pakhat bantuk independent ram ser kha kan ni tinh mi asi lo (kan duh ahcun i thim khawh cu asi). Miphun pakhat asi i nunphung, holh le ram (territory/land) a ngeimi paoh nih mah tein khuakhan lairelnak nawl (right to self-determination) kan ngei. UN phunglam le vawleipi upadi (international law) nih a cohlanmi covo asi. Cucu 1960 December 14 UN General Assembly Resolution 1514 (Declaration on the Granting of Independence to Colonial Countries and Peoples) nih tlamtling tein a cohlan.. Cu nawlngeihnak cu lam tampi hmangin kum 70 chung lak tthan kan ni zuam.

1947 ah Panglong hnatlaknak minthut in kan duhmi ”Federal Pyidaungsu” ram ser rak izuam asi. Asinain kan duhmi federal ram ser khawh loin Kawl cozah uknak tang tu ah kan phan. Phun dang chim ahcun ram uknak, nawlngeihnak le cozah vialte Kawl nih an lak dih. Federal ram ser dingin hnatlak a rak si nain 1947 Phunghrampi tangah “unitary state” tu ser a rak si. Tlangcungmi nih kan duhmi Federal ram sernak lam a rak pit.

June1960 ah Shan ramkhel hruaitu pawl hruainak in “Minority Peoples’ Conference” Tuanggyi khua ah rak tuah asi. Nihin ah Taunggyi Conference ti zong in theih asi. Taunggyi conference ah tlangcungmi nih 1947 phunhrampi remh in federal democracy ram “genuine federal union” ser dingah lungrual tein rak hal asi. Kawlmi U Nu le a party nih an rak duh lo. Kumkhat hnu ah Ne Win nih aana a lak i Federal ram sernak lam a pit hoi.

1962 Ne Win nih uknak a lak hnuah tlangcungmi vialte hriamtlai in Federal ram ser dingah i zuam tthan a hun si. Thisen tampi a luang i nunnak tampi a liam. Kum 50 chung zei a phi hmanh a chuak lo. Lam a pit dih. 2012 ah Thein Sein cozah nih kahdaihnak tuah dingah tlangcung hriamtlai phu pawl a sawm hna. Tlangcungmi hriam tlai tampi nih rampihuap kahdaihnak “Nationwide Ceasefire Agreement” (NCA) min an thut. Thein Sein cozah le ralkap nih “Federal phung kan pom” an hun ti.

Tlangcungmi tampi kan tha a tho tthan. Hriamtlai hna nih NCA lam in siseh, ramkhel party hna nih 2008 phunghrampi ningin tuahmi thimnak in siseh, Federal ram ser tthan dingah izuam tthan a hun si. Kumpi kum 8 chung ruahnak, thazang, le chawva chuah in Federal ram ser dingah Thein Sein cozah, NLD cozah le Ralkap pawl he ramkhel biaruahnak a phunphun tuah asi. Asinain ramkhel biaruahnak hma a kal lo. Atu ah Ralkap nih hramhram in uknak an lak cang tikah NCA lampi le ramkhel thimnak in Federal ram sernak lam a hun pit tthan.

Tulio dirhmun in Ralkap cozah he biaruah in Federal ram ser dingah asi kho lo. Parallel cozah bantuk asi mi CHPH cu zumh deuh an si nain ramkhel lei in i hngatchan ding tiangin bochan tlak an si lo. Hi dirhmun ah kan mah tein lam thar kawl kan hau in a lang. Hriamtlai phu lawng rinh awk an ttha lo. CRPH le NLD cozah lawng zong rinh khawh an si lo. Ralhrang (terrorist) bantuk asimi Ralkap cozah cu atu lio dirhmun in an kong ceihawk hmanh a ttha ti lo. Asi ahcun zei lam dah kan ngeih?

Lam pakhat te a um rua tiah ka ruahmi cu International Law hi asi. International laws pawl nih “internal self-determination” timi mah tein khuakhan lairelnak hi fek tein a cohlan kan theih. UN declarations tampi zong nih miphun pakhat mah tein khuakhan lairelnak nawl (people right to self-determination) hi a cohlangmi asi. Cu caah International laws pawl le UN declarations pawl i put in miphun le ram hruaitu Interim Federal Cozah ser in “Federated Chin State” tiah vawlei pi theih in thanh khawh asi.

Federal ram sernak kong biakhiah dingah Interim Federal Cozah nih International upadi ning tein referendum tuah piak khawh asi. Cu bantuk referendum cu 2017 ah Spain ram Catalonia le Iraq ram Kurdistan Region nih independence laknak caah an tuahmi kha kan hmuh. Kurdistan referendum cu UN member ram tampi nih an cohlan ti kha kan hmuh. A tulio kan dirhmun ah International law le UN declarations hna i tlaih in Catalonia le Kurdistan region bantuk in Federal ram sernak lamthar kawl zong hi lam (option) pakhat ah chiah a ttha hnga lo maw tihi ruah-awk ngai pakhat cu a hun si. By Rual Lian Thang

error: Content is protected !!