US president Trump Nih Thanhnak A Tuah Cang

US president thar caah Joe Biden lakluh asi hlan ah Washington DC ah buainak a chuak than sual lai ti phan a um ngai ko tiah thil thei mi hna nih an chim hnu ah president Donald Trump nih US capitol ah state of emergency phuan a lungtling i, nizan thiam ah khan emergency hi a phuan colh cang.

January ni 6 ah president Trump ttanhtu mi cheukhat hna nih US Capitol Building luh hnawh in buainak a chuah ruangah khan khuapi chung ah state of emergency phuang dinghin timhtuah asi. Federal Bureau of Investigation (FBI) nih January 20 ah president thar lakluh ding asi ruangah Washington DC lawnghmanh silo in state dang dang hna zongah buainak a chuak thut kho mi asi tiah an bulletin ah an tarlangh cang fawn.

President Donald Trump nihcun US Capitol Building luhhnawh in buainak a chuak mi kongah mawhphurtu bik ah Antifa pawl a puh hna. Antifa hi anti-fascist chimnak asi i, hi bu member hna nih hin far-right group hna he buainak an rak nei lengmang cang.

Donald Trump nihcun George Floyd thah asi ruangah an ram chung hmun dangdang ah duhlonak langhter asi lio ah khan Antifa pawl hi terrorist organisation ah phuan dingin a rak hrocer bal cang hna.

error: Content is protected !!