Billy Graham Fanu Anne Graham Lotz Nih US Capitol Inn Hmai Ah Thla A Rak Cam

Billy Graham Fanu Anne Graham Lotz Nih US Capitol Inn Hmai Ah Thla A Rak Cam Lio Ah Pathian Bochan Bu Tein US Ram A rak Hruaitu Hna A Vun Ngai/ Theih Tthan Ruangmang Hna
***************************************************************
Vawilei pi nih thlarau leiah kan pa tiah ruahmi Evangelist minthang Billy Graham fanu Anne Graham Lotz hruainak in US Capitol inn hmai ah Pathian sin thlacamnak an rak ngei. Anih hi Billy Graham a fale 5 lak ah upa bik changtu a si i a tu hi kum 73 a si cang. Bible sianginn ah ca chim rian a ttuan pah in cauk zong tampi a rak ttial tu a si. Cun AnGeL Ministries timi zong a dirh.

Hi lio US Capitol innhmai i thla rak cam mi te ngaih ahhin lung hna hno i ngaih zong a chia. A thlacam mi a tawinak tein, ”Zeizong vialte sertu Pathian, Abraham Pathian, Jocob Pathian, Isak Pathian. George Washington, John Adams le Abraham Lincoln hna Pathian. Ka pa a Pathian, keimah ka Pathian le kanmah vialte kan Pathian, US mipi hi na hmaika ah kan sual tuk cang. Nangmah ralchanh in sualnak phunkip kan tuah cang.

Cucaah cun US mipi aiawh in na sinah ngaihthiam hal in thla ka cam. Nang cu dawtnak Pathian, zawnruahnak Pathian le a biakam a let bal lomi Pathian na si bantukin US mipi kan sual, kan palhnak vialte hi kan ngai thiam hram ko sawh. Kan ramm hi thluachuah pe tthan ko. Kan ram damter tthan ko” tiah lung hno tak le lungthin tak in thla a cam.

Anne Graham Lotz a thlacam cu khat leiin ngaih hna a chia. US ram a rak dirhtu hna le Pathian bochan bu tein ram a rak hruai hmasatu hna a vun hlam ruangmang hna. Kan theih dih bantukin US cu Pathian mithmai zoh buin le Pathian bochan buin Khrihfa ttha hna nih rak dirhmi a si. Nain nihin ahcun US rampi hi Satan nih hmunhma tam deuh a lak cang.

Anne Graham nihhin cuti Satan nih hmun a lakmi a ruah tikah a celh hrim lo i, Pathian bochan buin US rampi a rak hruaitu hna a hlam tthan ruangmang hna timi a thlacam ngaih in hngalh khawh a si. US hruaitu hna lakah min a vun char tthan mi hna George Washington hi a pakhatnak US president a si. John Adams hi a pahnihnak president le Abraham Lincoln cu 16 president an si. Credit: Biak Tum Lian

error: Content is protected !!